गणेश जाधव, फुलंब्री : यंदा जुलै आणि सप्टेंबर महिन्यातच रिमझिम पाऊस झाला. जून आणि ऑगस्ट कोरडा गेला. आता ऑक्टोबरचा पहिला पंधरवडा संपत आला. पण, कडक ऊन पडत आहे. त्यामुळे जमीन कोरडी पडत आहे. जलसाठेही कोरडे आहेत. परिणामी, या वर्षी रब्बीचा हंगामही धोक्यात येणार असल्याचे चित्र आहे.

या वर्षी पावसाअभावी खरीप पिकांचे अतोनात नुकसान झाले. मका पिकातून लागवड खर्चही निघणे अवघड झाले आहे. कपाशीचीही तीच अवस्था आहे. त्यामुळे शेतकऱ्यांची भिस्त आता रब्बी पिकांवर आहे. मात्र, सद्यःस्थिती पाहिली तर रब्बी हंगामाचे भवितव्य अधांतरी आहे. परतीचा पाऊस चांगला पडला तर रब्बीसाठी जमिनीत ओलावा असेल. त्यामुळे पेरण्या करता येतील. पण, परतीच्या पावसाचीही आशा आता मावळली आहे. एवढेच नाही तर जलसाठेही तहानलेले आहेत. त्यामुळे रब्बी पिकाची पेरणी करुन पाण्याची भरणी कशी करावी, असा प्रश्न शेतकर्यांसमोर आहे. सध्या तालुक्यात बर्याच परिसरामध्ये मका सोंगणीची लगबग चालू आहे. काही शेतकऱ्यांनी पुढील पिकाची पेरणीची तयारी केली आहे. त्यातून जनावरांच्या चाऱ्याचा प्रश्न सुटेल, अशी आशा त्यांना आहे. अपुर्या पावसामुळे खरीप हंगाम हातचा गेला; परंतु रब्बी हंगामात खरिपातील आर्थिक तूट भरून काढण्याची संधीही निसर्गाने हिसकावून घेतली. त्यामुळे आगामी काळात रब्बीचे गहू, हरभरा व कांदा पीक घेणे धोक्यात आले आहे. गतवर्षी १०० टक्के पावसाळा झाल्याने सर्वत्र रब्बी व उन्हाळी हंगाम बहरात होता. गहू, हरभरा, भुईमूग व कांदा पिकाचे मोठ्या प्रमाणात उत्पादन झाले होते; मात्र यावर्षी परिस्थितीने शेतकर्यांना आर्थिक संकटात टाकले आहे. या वर्षी पावसाने सुरुवातीपासूनच दगा दिला. त्यामुळे खरिपाची पिके धोक्यात आली. खरिपाच्या पिकांना लागलेला खर्चही झालेल्या उत्पादनातून निघालेला नसल्याने शेतकरी पार खचला आहे.

यावर्षी अत्यल्प पाऊस झाला. पाऊस पडण्याची कोणतीही शक्यता दिसत नाही. स्वच्छ सूर्यप्रकाश पडत आहे. पहाटेला थंडी जाणवत आहे. आता पाऊस पडेल असे दिसत नाही. जलसाठे तहानलेले आहे. – प्रकाश जाधव, शेतकरी