म.टा. प्रतिनिधी, नागपूर: गेल्या काही दिवसांपासून पेस्ट स्वरूपात प्रायव्हेट पार्टमध्ये लपवून सोने आणण्याच्या घटना सातत्याने पुढे येत आहेत. याच पद्धतीने मंगळवारी पहाटे येथील डॉ. बाबासाहेब आंबेडकर आंतरराष्ट्रीय विमानतळावर दोन किलो सोने जप्त करण्यात आले. याप्रकरणी दोहा येथून आलेल्या दोघांना अटक करण्यात आली आहे. मो. शाहीद नालबंद (वय ३३, रा. हुबळी, कर्नाटक) आणि पीरबाबा कलंदर बाबूसा सौदागर (वय ३८, हंगल, कर्नाटक) अशी अटकेतील आरोपींची नावे आहेत.
एसआयआयबीच्या अधिकाऱ्यांनी दोघांनाही तात्काळ ताब्यात घेत झडती घेतली. झडतीदरम्यान लपवून ठेवलेले पेस्ट स्वरूपातील दोन किलो सोने सापडले. याची किंमत जवळपास एक कोटी रुपयांच्या घरात आहे. आरोपींचा मोबाइल फोन, पासपोर्ट जप्त करण्यात आला असून पुढील चौकशी सुरू असल्याची माहिती सूत्रांनी दिली.
आंतरराष्ट्रीय उड्डाणे ठरताहेत माध्यम
पेस्ट स्वरूपातील सोने तस्करीच्या घटना सातत्याने घडताहेत. शारजाह वा दोहा येथून येणाऱ्या प्रवाशांच्या माध्यमातून ही तस्करी करण्यात येते. तस्करीचा असाच प्रयत्न नागपूर सीमाशुल्क विभागाने १० जानेवारी रोजी निष्फळ करून १.७३ किलो सोने जप्त केले होते. त्यानंतर फेब्रुवारी महिन्यात ७०० ग्रॅम सोने जप्त करण्यात आले होते. सूत्रांनी दिलेल्या माहितीनुसार, मागीलवर्षी नागपूर विमानतळावर झालेल्या अशा स्वरूपातील तीन घटनांमध्ये ५ कोटींचे जवळपास १० किलो सोने पकडण्यात आले होते.