म. टा. वृत्तसेवा, पालघर : बोईसर येथील एका २९ वर्षीय तरुणीने नोकरी मिळवून देणाऱ्या संकेतस्थळावर सादर केलेल्या कागदपत्रांचा आधार घेत तिची चार लाख ९० हजार रुपयांची फसवणूक करण्यात आल्याचे उघड झाले आहे. या प्रकरणी पुणे येथील आदिला नीतारा नामक महिलेविरोधात गुन्हा नोंदवण्यात आला आहे.
बोईसरमधील भांडार वाडा येथे राहणाऱ्या या महिलेने नोकरी मिळवून देणाऱ्या संकेतस्थळावर आपला रिझ्यूमे अपलोड केला होता. आरोपींनी वैयक्तिक माहिती व मोबाइल क्रमांकाआधारे व्हॉट्सअॅप आणि टेलिग्राम या अॅपच्या माध्यमातून या तरुणीशी संपर्क साधून, ‘वर्क फ्रॉम होम’ उपलब्ध असल्याचे सांगितले. विविध रेस्टॉरंटना गुगलवर रेटिंग दिल्यास प्रत्येक रेटिंगसाठी विशिष्ट रक्कम देण्याचे आमिष त्यांनी दाखवले. दिलेले टास्क पूर्ण केल्यानंतर, प्रारंभी काही रक्कम मोबदला म्हणून देण्यात आली. मात्र नंतर टास्क पूर्ण करण्यासाठी रक्कम भरली, तर चांगला फायदा देण्यात येईल, असे आमिष दाखवून या महिलेकडून चार लाख ९० हजार रुपयांची रक्कम उकळण्यात आली.
आपली फसवणूक झाल्याचे लक्षात येताच या महिलेने पालघर पोलिसांकडे आरोपी आदीला नितारा हिच्याविरोधात ऑनलाइन तक्रार दाखल केली. त्यानंतर बोईसर पोलिस ठाण्यात आरोपीविरोधात फसवणुकीचा आणि माहिती तंत्रज्ञान कायदा कलम ६६(क) ६६(ड)अन्वये गुन्हा दाखल करण्यात आला. या प्रकरणाचा तपास बोईसर पोलिस ठाण्याचे वरिष्ठ पोलिस निरीक्षक उमेश पाटील हे करत आहेत.