मुंबई : बेस्टच्या विनावातानुकुलित डबलडेकर बसमधून होणारा प्रवास काही वेगळाच असतो. या बसच्या वरच्या डेकवर जाऊन आसन मिळवण्यासाठी, तेही खिडकीकडील जागा मिळवण्यासाठी प्रवाशांची धडपड सुरू असते. मात्र जुन्या डबल डेकरचा हाच प्रवास १५ सप्टेंबरनंतर थांबणार आहे. ब्रिटीशकाळापासून सुरू झालेल्या नॉन एसी डबलडेकरची शेवटची बस १५ सप्टेंबरला धावेल. आयुर्मान संपल्याने या बस कालबाह्य करण्याचा निर्णय बेस्ट उपक्रमाने घेतला आहे. त्यानंतर फक्त एसी डबलडेकर बसच प्रवाशांच्या सेवेत असतील.
समारंभ होणार नाही
बेस्ट उपक्रमाची शेवटची विनावातानुकुलित डबलडेकर बस १५ सप्टेंबरला धावणार आहे. बस क्रमांक ४१५ असून ही बस अंधेरी स्थानक पूर्व ते सीप्झ अशी धावेल. त्यानंतर ही बस सेवेतून काढण्यात येईल. सध्या बेस्ट उपक्रमाच्या ताफ्यात १६ एसी डबल डेकर बस आहे. तर आणखी १९ एसी डबलडेकर बसताफ्यात असून त्या लवकरच प्रवाशांच्या सेवेत येतील, अशी माहिती उपक्रमातील सूत्रांनी दिली. शेवटची बस हद्दपार होणार असल्याने या बसला निरोप देण्यासाठी कोणताही समारंभ उपक्रमाने आयोजित केलेला नाही.
शांतिस्वरुप भटनागर पुरस्कारांची घोषणा; देशाभरातील ‘या’ १२ शास्रज्ञांचा होणार सन्मान
संग्रहालयात ठेवण्याचा विचार
मुंबईत इंग्रजांच्या काळात सुरू झालेली डबलडेकर बस नेमकी कशी होती, शेवटची बस प्रवासी आणि पर्यटकांना पाहता यावी, यासाठी आणिक आगार येथे असलेल्या बेस्ट उपक्रमाच्या संग्रहालयात ठेवण्याचा विचार उपक्रमाचा आहे. मात्र यावर अद्याप अंतिम निर्णय झालेला नाही. मुंबईकरांचे या डबलडेकरशी नाते जुळले असून त्यामुळे ही बस जतन करण्यासाठी मुंबईकरांनी साथ देण्याची मागणी आपली बेस्ट आपल्यासाठीकडून करण्यात आली आहे.