म. टा. प्रतिनिधी, ठाणे : १० थर रचून विश्वविक्रम करण्याचे जोगेश्वरीच्या जय जवान गोविंदा पथकाचे स्वप्न यंदाही भंगले. नौपाडा येथील मनसे ठाणे जिल्हा आयोजित दहीहंडी उत्सवात या पथकाचा १० थरांचा प्रयत्न अयशस्वी ठरला. मनसे अध्यक्ष राज ठाकरे यांच्यासमोरच हे थर रचताना गोविंदा खाली कोसळल्याने उपस्थित प्रत्येकाचा हिरमोड झाला. त्याआधी सकाळी वर्तकनगर येथील आमदार प्रताप सरनाईक यांच्या संस्कृती युवा प्रतिष्ठानतर्फे आयोजित दहीहंडी उत्सवात ‘जय जवान’ने यशस्वी नऊ थरांची सलामी दिली होती. मनसेच्या दहीहंडी उत्सवात पुन्हा नऊ थरांची शिस्तबद्ध सलामी पथकाने दिली. मात्र १० थरांचा त्यांचा प्रयत्न सफल न झाल्याने ठाण्यात यंदाही १० थरांच्या विश्वविक्रमाची ‘घागर उताणी’च राहिली.

दहीहंडी उत्सवाची पंढरी म्हणून ओळखल्या जाणाऱ्या ठाण्यात आठ बड्या राजकीय आयोजकांनी दहीहंडी उत्सवाचे आयोजन केले होते. यामध्ये शिवसेना, शिवसेना (उद्धव बाळासाहेब ठाकरे), मनसे व भाजप या पक्षांचा समावेश होता. याठिकाणी मुख्यमंत्री एकनाथ शिंदे, उपमुख्यमंत्री देवेंद्र फडणवीस, मनसेअध्यक्ष राज ठाकरे, केंद्रीय मंत्री कपिल पाटील, खासदार डॉ. श्रीकांत शिंदे या राजकीय नेत्यांनी आणि सिनेकलाकारांनी हजेरी लावत गोविंदाचा उत्साह वाढवला. सकाळी सर्वप्रथम जय जवान गोविंदा पथकाने वर्तकनगर येथे सुररुवातीला नऊ थर रचण्याचा अयशस्वी प्रयत्न केल्यानंतर काही वेळातच याठिकाणी नऊ थर रचले. त्यांना ११ लाख रुपये रोख व चषक देऊन आयोजक प्रताप सरनाईक व युवासेनेचे पूर्वेश सरनाईक यांनी सन्मानित केले. यापाठोपाठ जोगेश्वरीच्याच कोकणनगर गोविंदा पथकाने याठिकाणी नऊ थरांची सलामी दिली. मनसे आयोजित दहीहंडी उत्सवातही ठाणे पूर्वेच्या आई चिखलादेवी गोविंदा पथकासह कांदिवलीच्या ओम साई माऊली, बोरिवली गोराई उत्कर्ष दहीकाला पथकाने आठ थरांची यशस्वी सलामी दिली. तर दुसरीकडे ठाण्याच्या लक्ष्मी-चिरागनगर येथील सहयोग गोविंदा पथकाने वर्तकनगर येथे आठ थर रचले. याठिकाणीच महिलांच्या पार्ले स्पोर्ट्स क्लब महिला गोविंदा पथक व शिवतेज महिला गोविंदा पथकांनी यशस्वी सहा थरांची सलामी दिली. यासोबत शिवसेनेचे (उद्धव बाळासाहेब ठाकरे) खासदार राजन विचारे आयोजित जांभळी नाका येथील आनंद चॅरिटेबल ट्रस्टच्या ‘निष्ठेचे महादहीहंडी’ उत्सवात विविध गोविंदा पथकांनी यशस्वी सलामी देत पारितोषिक पटकावले.
भन्नाटच! QR Code सांगणार गणेशमूर्ती मातीची की POPची; फक्त एक काम करावं लागेल
ट्रक, गाड्यांची महामार्गावर कोंडी

शिवसेना आमदार रवींद्र फाटक आयोजित संकल्प गोविंदा पथकाची रघुनाथनगर येथील दहीहंडी उत्सव, हिरानंदानी मेडोज येथील भाजप नेते शिवाजी पाटील यांच्या स्वामी प्रतिष्ठान आयोजित दहीहंडी उत्सव, बाळकूम नाका येथील शिवसेनेचे माजी नगरसेवक संजय भोईर यांच्या साई जलाराम प्रतिष्ठान आयोजित दहीहंडी उत्सवामुळे मुख्य चौक आणि रस्ते बंद करण्यात आले होते. त्यातच गोविंदाचे ट्रक, टेम्पो, कार व दुचाकींमुळे शहरातील रस्ते, महामार्गावर मोठी कोंडी सायंकाळी उशिरापर्यंत होती.