बंडू येवले, लोणावळा : मावळ तालुक्यातील विसापूर किल्ल्यावर दुर्ग भ्रमंती व पर्यटनासाठी मित्रांसोबत आलेला एक तरुण गडपरिसरात वाट चुकला होता. यावेळी पुन्हा वाट शोधण्याचा प्रयत्न करत असताना तो येथील एका धबधब्याच्या जवळ घसरून पडल्यामुळे गंभीर जखमी झाला. या तरुणाला लोणावळ्यातील शिवदुर्ग मित्र, वन्यजीव रक्षक संस्थेच्या आपत्कालीन पथकासह पाटण ग्रामस्थांनी सोमवारी रात्री साडेबाराच्या सुमारास गडावरून सुखरूप खाली आणून त्याला जीवदान दिले आहे.
अर्जून पाटील (रा. मिरज, सांगली) असे वाट भरकटून धबधब्याच्या जवळ निसटून पडल्यामुळे गंभीर जखमी झालेल्या तरुणाचे नाव आहे.
अर्जून पाटील (रा. मिरज, सांगली) असे वाट भरकटून धबधब्याच्या जवळ निसटून पडल्यामुळे गंभीर जखमी झालेल्या तरुणाचे नाव आहे.
शिवदुर्ग मित्रचे सचिव सुनील गायकवाड यांनी दिलेल्या माहितीनुसार, अर्जुन पाटील आणि त्याचे मित्र शैलेश गायकवाड, विक्रम जाधव आणि उतारेश्वर सुरवस हे चौघेजण रविवारी दुपारी १ वाजताच्या दरम्यान मावळातील विसापूर किल्ल्यावर दुर्ग भ्रमंती व पर्यटनासाठी आले होते. किल्ल्यावर फिरल्यावर ते सायंकाळी ५ वाजता परत येत होते. यावेळी अर्जुन मित्रांपासून बाजूला दुसऱ्या वाटेने चालत गेला होता. यावेळी त्याने मित्रांना फोन करून सांगितले की, मी खाली गावाकडे चाललो आहे. थोड्या वेळाने तो गडकिल्ला परिसरात वाट भरकटून येथील एका धबधब्याच्या जवळ निसटून जोरात पडल्यामुळे गंभीर झाला. यामध्ये त्याचा एक हात पॅक्चर झाला आणि हनुवटीला जोरात मार लागल्याने दात पडले होते. तसेच त्याला उभं राहता येत होतं, पण चालताना पाय नीट पडत नव्हते. यामुळे त्याने मित्रांना फोन करून घडलेल्या प्रसंगाची माहिती देत मदतीला बोलावले. हा प्रसंग ऐकून त्याचे मित्र गोंधळले होते. मात्र त्याच्या मित्रांनी परिस्थितीचे गांभीर्य लक्षात घेत त्याला शोधत खाली पाटण गावापर्यंत आले.
गावातील लोकांना घडलेली घटना सांगितली व गावातील काही तरुण अर्जुनला शोधण्यासाठी निघाले. त्याचवेळी लोणावळ्यातील शिवदुर्ग मित्रच्या आपत्कालीन पथकाला सायंकाळी ७ वाजता मेसेज आला होता. पण स्थानिक लोक त्याला शोधून खाली गावात घेऊन येतील म्हणून शिवदुर्गच्या पथकाने काहीवेळ वाट पाहिली. परंतु रात्री साडेनऊच्या दरम्यान स्थानिक लोकांनी मदतीसाठी शिवदुर्ग मित्रच्या आपत्कालीन पथकाला येण्याचे आवाहन केले.
परिस्थिती लक्षात घेऊन शिवदुर्गचे आपत्कालीन पथक व वन्यजीव रक्षक मावळ संस्थेचे शिवदुर्ग मित्र लोणावळा व वन्यजीव रक्षक मावळ संस्थेचे सदस्य सदस्य तत्काळ विसापूर किल्ल्याच्या दिशेने रवाना होत घटनास्थळी दाखल झाले. आपत्कालीन पथकातील योगेश उंबरे, प्रणय अंभूरे, कुणाल कडू, रतन सिंग, आदित्य पिलाने, सिद्धेश निसाळ, अमोल सुतार, योगेश दळवी, मयुर दळवी, सागर कुंभार, अजय मयेकर, चंद्रकांत बोंबले, अनिल आंद्रे, सुनिल गायकवाड, संभाजी तिकोणे, रवींद्र तिकोणे, विनायक तिकोणे यांच्यासह पाटणच्या काही ग्रामस्थांनी जखमी झालेल्या अर्जुनला स्पाइन बोर्ड लावून स्केडच्या स्ट्रेचरमधून खाली आणले. यावेळी पथकाला वाटेत नागमोड्या व अत्यंत धोकादायक वाटा, झाडेझुडपे, खळखळणारे धबधबे, चिकट शेवाळलेले दगड, चिखल, दाट झाडीतून मोठ्या मेहनतीने स्ट्रेचरमधून रात्री साडेबाराच्या दरम्यान अर्जुनला खाली आणले आणि त्याला पुढील उपचारासाठी नजिकच्या हॉस्पिटलमध्ये दाखल करण्यात आले. या मदतीमुळे अर्जुन आणि त्याच्या मित्रांनी आपत्कालीन पथकासह पाटण ग्रामस्थांचे आभार मानले.