म.टा.प्रतिनिधी, येरवडा : कामावरून काढून टाकल्याने आणि कामाचे पैसे न दिल्याच्या वादातून दारू पिण्यासाठी बसलेल्या कामगारांमध्ये जोरदार भांडणे झाली. दारूच्या नशेत मित्रांनी शिवीगाळ करणाऱ्या कामगार मित्राचा धारदार हत्यारांनी वार करून, तसेच डोक्यात सिलेंडर घालून निर्घृण खून केला. वाघोली केसनंद रस्त्यावरील लेबर कॅम्पमध्ये मंगळवारी रात्री १० वाजता खुनाची ही घटना घडली. लोणीकंद पोलिसांनी दोन आरोपींवर गुन्हा दाखल केला असून त्यांचा कसून शोध घेतला जात आहे.
शैलेश मांडगीकर असे खून झालेल्या कामगाराचे नाव आहे. याप्रकरणी संगम चंद्रशेखर धारीया (वय.२३, रा. सध्या, सिट्रोन सोसायटी समोर, केसनंद,मूळ गाव उत्तर प्रदेश) याने फिर्याद दिली आहे. त्यावरून राम सुभाष श्रीराम (वय.२५, रा.नांदेड) आणि गोपाल ज्ञानोबा कोटलापुरे (वय.२५, रा.लातूर) यांच्यावर खुनाचा गुन्हा दाखल करण्यात आला आहे.
शैलेश मांडगीकर असे खून झालेल्या कामगाराचे नाव आहे. याप्रकरणी संगम चंद्रशेखर धारीया (वय.२३, रा. सध्या, सिट्रोन सोसायटी समोर, केसनंद,मूळ गाव उत्तर प्रदेश) याने फिर्याद दिली आहे. त्यावरून राम सुभाष श्रीराम (वय.२५, रा.नांदेड) आणि गोपाल ज्ञानोबा कोटलापुरे (वय.२५, रा.लातूर) यांच्यावर खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, वाघोली केसनंद रस्त्यावर सिट्रोन सोसायटीसमोर कामगारांचे लेबर कॅम्प आहे. फिर्यादी धारिया हा एक साईटवर प्लंबिंगचे काम करतो. १ ऑगस्ट रोजी धारिया राहत असलेल्या खोलीत राम श्रीराम नावाचा कामगार राहण्यास आला. त्यानतंर श्रीराम याने त्याच्या ओळखीचा शैलेश मांडगीकर यालाही कामासाठी बोलावून घेतले. राम आणि शैलेश दोघे बिगारी काम करायचे. शैलेश याला दारूचे व्यसन होते. त्यामुळे रोज दारू पिऊन खोलीत आल्यावर फिर्यादी आणि श्रीराम याला शिवीगाळ करायचा. श्रीराम याचा मित्र आरोपी गोपाल कोटलापुरे हा देखील अधून मधून भेटण्यासाठी येत होता.
मांडगीकर हा रोज दारू पिऊन शिवीगाळ करून धिंगाणा घालत असल्याने त्याला कामावरून काढून टाक, असे श्रीराम याने ठेकेदाराला सांगितले. ठेकेदार राजपाल बिराजदार याने मांडगीकर याला उद्यापासून कामावर येऊ नको आणि तुझे कामाचे पैसे घेऊन जा, असे सांगितले. त्यामुळे मांडगीकर हा श्रीरामवर चिडून होता. मंगळवारी रात्री मांडगीकर, श्रीराम आणि कोटलापुरे तिघे खोलीत दारू पिण्यासाठी बसले होते. त्यावेळी मांडगीकर याने तुझ्यामुळे मला कामावरून काढून टाकले म्हणून श्रीराम आणि कोटलापुरे यांना शिवीगाळ करून भांडणे करू लागला. त्यामुळे श्रीराम आणि कोटलापुरे या दोघांनी मांडगीकर याच्यावर धारदार हत्याराने वार करून लहान आकाराच्या सिलेंडर डोक्यात घालून खून करून पळून गेले.
दरम्यान, पोलीस उपायुक्त शशिकांत बोराटे, सहायक पोलिस आयुक्त संजय पाटील, वरिष्ठ पोलीस निरीक्षक विश्वजीत काईंगडे, पोलीस निरीक्षक सीमा ढाकणे ,मारुती पाटील यांनी घटनास्थळी भेट दिली. फरार आरोपींचा पोलीस पथकाकडून कसून शोध घेतला जात आहे.