दिशाच्या या यशाबद्दल सर्वच थरातून तिच्यावर अभिनंदनाचा वर्षाव होत आहे. दिशाचे वडील हॉलसेलचे व्‍यापारी असून, घरात सीए अशी पार्श्वभूमी नाही. वाणिज्‍य शाखेतून अकरावीला प्रवेश घेतल्‍यानंतर सीए करण्याचा निर्धार केला. त्यानुसार ध्येय डोळ्यासमोर ठेवत नाशिकच्या गंगापूर रोड परिसरातील एक नामांकित शिकवणी लावली. तसेच अन्य मार्गदर्शकांच्या मार्गदर्शनाखाली परीक्षेच्‍या तयारीला सुरूवात केली. अकरावीपर्यंत दोन ते तीन तासिका घेतल्‍यानंतर बारावीपासून मात्र पूर्णवेळ लक्ष केंद्रित केले. सकाळी पहिल्‍या सत्रात बारावीचा अभ्यास आणि दुपार सत्रात सीए फाउंडेशनचा अभ्यास सुरू ठेवला. घरी गेल्‍यावर होमवर्क करताना मित्र, परिवारासोबत मौजमजा करत हलके-फुलके वातावरण ठेवण्यावर भर दिला.