म. टा. खास प्रतिनिधी,मुंबई : वर्सोवा येथे राहणारे दाम्पत्य एअर इंडियामध्ये नोकरीला होते. आयुष्याच्या शेवटच्या क्षणांसाठी त्यांनी आयुष्यभर कष्ट करून पैसे जमा करून ठेवले. या पैशांच्या आधारे जीवन सुरळीत सुरू असतानाच बँक खात्याचे ‘केवायसी’ अपडेट करण्यासाठी एक फोन आला आणि काही मिनिटांतच दहा लाख रुपयांवर सायबरचोरांनी डल्ला मारला.
काय घडलं?
काय घडलं?
जुहू-वर्सोवा लिंक रोडवरील एका सोसायटीमध्ये रिटा (बदललेले नाव) या पतीसोबत वास्तव्यास आहेत. पती-पत्नी दोघेही एअर इंडिया कंपनीत नोकरीला होते. काही वर्षांपूर्वी दोघे निवृत्त झाले. रिटा यांच्या मोबाइलवर एचडीएफसी बँकेतील खात्याचे ‘केवायसी’ अपडेट करण्यासाठी एक संदेश आला. ‘केवायसी’ नूतनीकरण न केल्यास खाते बंद करण्यात येईल, असे या संदेशात नमूद करण्यात आले होते.
रिटा यांनी ताबडतोब या संदेशातील मोबाइल क्रमांकावर संपर्क साधला. समोरील व्यक्तीने आपण वयस्कर दिसता त्यामुळे आपल्यासाठी मी ॲानलाइन केवायसीची सुविधा उपलब्ध करून देतो, असे सांगितले. घरबसल्या काम होणार असल्याने रिटा यांनी यासाठी तयारी दर्शवली. राज नाव सांगणाऱ्या या कथित प्रतिनिधीने रिटा यांना ‘ॲनी डेस्क’ हे ॲप डाऊनलोड करण्यास सांगून त्यांच्या मोबाइलाचा ताबा मिळवला. रिटा यांना मात्र याबाबत काहीच कल्पना नव्हती.
राज ज्याप्रमाणे सांगत होता त्याचप्रमाणे रिटा या मोबाइलमध्ये बॅंक खाते आणि डेबिट कार्डबाबत तपशील भरत होत्या. ‘ॲनी डेस्क’मुळे राजला मोबाइलवर भरली जात असलेली सर्व माहिती दिसत होती. त्याने तो तपशील वापरला आणि रिटा यांच्या मोबाइलवर येणाऱ्या ओटीपींचा वापर करून टप्प्याटप्प्याने त्यांच्या बॅंक खात्यामधून सुमारे दहा लाख रूपये वेगवेगळ्या बँक खात्यावर परस्पर वळविले.
आपल्या खात्यातील पैसे वजा होत असल्याचे संदेश पाहून रिटा यांना धक्का बसला. त्यांनी त्वरीत बँकेत फोन करून खात्यामधील व्यवहार थांबविण्यास सांगितले. दहा लाख गेले मात्र व्यवहार थांबविण्यात आले. रिटा यांनी याबाबत पोलिस ठाण्यात तक्रार केली.