आमदार फारुक शहा यांनी धुळे शहरातील अनेक भागात रस्ते आणि गटारीसाठी तसेच मूलभूत सुविधांसाठी कोट्यवधी रुपयांचा निधी शासनाकडून प्राप्त करून घेतला आहे. त्यातून सुमारे दोन कोटी रुपये खर्च अपेक्षित असलेल्या रस्ते कामाचा शुभारंभ आमदार फारुक शहा यांच्या हस्ते करण्यात आला. धुळे महापालिकेच्या भ्रष्ट कारभाराला धुळेकर नागरिक कंटाळले आहेत. सत्ताधारी नगरसेवक तसेच पदाधिकारी फक्त शहरातील नागरिकांच्या कररुपी पैशांवर डल्ला मारण्याच्या प्रयत्न करीत आहेत. मात्र आमदारांच्या प्रयत्नांमुळे आज अनेक भागात विकासकामे सुरू आहेत. तसेच शहरातील प्रभाग क्रमांक दोनचे विकास कामे होत नसल्यामुळे आमदार डॉ. फारुक शहा यांनी संपूर्ण प्रभाग दत्तक घेत असल्याचे जाहीर केले. धुळे महापालिकेत भाजपाची एक हाती सत्ता असून देखील पदाधिकाऱ्यांनी गेल्या चार वर्षांपासून धुळेकरांना विकासापासून वंचित ठेवले आहे. हे धुळेकर जनता जाणून आहे. येत्या निवडणुकीत मतदार त्यांना घरचा रस्ता दाखविल्याशिवाय राहणार नाहीत, असा विश्वास आमदारांनी यावेळी व्यक्त केला.