म. टा. प्रतिनिधी, पुणे : येवलेवाडीतील कपड्याच्या गोदामाला भीषण आग लागल्याची घटना शुक्रवारी सकाळी आठ वाजता घडली. गोदामातील साहित्याने पेट घेतल्याने आग भडकली. अग्निशमन दलाच्या जवानांनी घटनास्थळी धाव घेऊन तीन तासांत आग आटोक्यात आणली. या घटनेत गोदाम जळून खाक झाले. सुदैवाने जीवितहानी टळली. येवलेवाडी परिसरात कपड्यांची आणि फर्निचरची अनेक गोदामे असून, तेथील सुरक्षिततेचा प्रश्न कायम आहे.
येवलेवाडी गावाच्या कमानीजवळील दीपचंद धरमचंद शहा या फॅब्रिक कंपनीच्या गोदामास आग लागल्याची माहिती अग्निशमन दलाच्या मुख्य नियंत्रण कक्षास सकाळी मिळाली. आग लागल्याने गोदामातील पडदे आणि कपड्यांनी पेट घेतला. आग भडकल्याने परिसरात मोठ्या प्रमाणावर धुराचे लोट पसरले होते. अग्निशमन दलाचे १४ बंब घटनास्थळी दाखल झाले. आग मोठ्या प्रमाणात भडकली होती. काही किलोमीटर अंतरावरून आगीचे लोळ दिसत होते. गोदामाचे शटर आतून बंद असल्याने जवानांना ते कटरच्या साह्याने कापून आत प्रवेश करावा लागला. त्यामुळे आग विझवण्यासाठी वेळ लागला. अग्निशमन दलाच्या जवानांनी पाण्याचा मारा करून आग आटोक्यात आणली. आगीमागचे कारण समजू शकले नाही. परिसरातील नागरिकांना सुरक्षितस्थळी हलवण्यात आले होते.
येवलेवाडी गावाच्या कमानीजवळील दीपचंद धरमचंद शहा या फॅब्रिक कंपनीच्या गोदामास आग लागल्याची माहिती अग्निशमन दलाच्या मुख्य नियंत्रण कक्षास सकाळी मिळाली. आग लागल्याने गोदामातील पडदे आणि कपड्यांनी पेट घेतला. आग भडकल्याने परिसरात मोठ्या प्रमाणावर धुराचे लोट पसरले होते. अग्निशमन दलाचे १४ बंब घटनास्थळी दाखल झाले. आग मोठ्या प्रमाणात भडकली होती. काही किलोमीटर अंतरावरून आगीचे लोळ दिसत होते. गोदामाचे शटर आतून बंद असल्याने जवानांना ते कटरच्या साह्याने कापून आत प्रवेश करावा लागला. त्यामुळे आग विझवण्यासाठी वेळ लागला. अग्निशमन दलाच्या जवानांनी पाण्याचा मारा करून आग आटोक्यात आणली. आगीमागचे कारण समजू शकले नाही. परिसरातील नागरिकांना सुरक्षितस्थळी हलवण्यात आले होते.
सकाळी आठ वाजून पाच मिनिटांनी आगीची माहिती मिळाली. गोदामाचे शटर बंद असल्याने ते कापून आत जाण्यास वेळ लागला. तोपर्यंत आग भडकली होती. गोदामातील पन्नास टक्क्यांपेक्षा जास्त माल जळून खाक झाला आहे. नागरिकांनी स्फोटाचा आवाज ऐकला. या घटनेत कोणीही जखमी झाले नाही.- समीर शेख, अधिकारी, कोंढवा अग्मिशमन केंद्र
ना-हरकत प्रमाणपत्र घेतले नव्हते
गोदाम आणि व्यवसायासाठी अग्निशमन दलाचे ना हरकत प्रमाणपत्र आवश्यक असताना दीपचंद धरमचंद शहा या फॅब्रिक कंपनीने हे प्रमाणपत्र घेतले नसल्याचे समोर आले आहे. आग लागू नये म्हणून कोणतीही काळजी घेतली नसल्याचे जवानांना आढळले. आग नियंत्रण (फायर एक्सटिंग्विशर) यंत्र होते; पण त्याचा उपयोग झाला नाही. गोदामात स्मोक डिटेक्टर नसल्याचे यानिमित्ताने समोर आले आहे.