मुंबई: अजितदादा, फडणवीस अन् पहाटेच्या शपथविधीच्या चर्चा थांबायचं नावच काढत नाहीयत…उलट गेल्या ४ वर्षांत टप्प्याटप्प्याने नवे खुलासे होऊन याबाबतच्या चर्चांना ऊतच येतोय…फडणवीस अन् शरद पवारांची गेल्या काही तासांतली विधानं याचंच उदाहरण…नव्या झालेल्या या खुलाशांमुळे आता कोणी नेमकं काय केलंय? असा प्रश्नच तुम्हाला पडेल…म्हणजे अजितदादांनी बंडखोरी केली? शरद पवारांनी गुगली टाकली? की ठाकरेंना धडा शिकवण्यासाठी फडणवीसांनी गेम केला? सगळाच गोंधळ…पण ताज्या विधानांचा संदर्भ घ्यायचा झाल्यास या सगळ्यात खरा गेम अजितदादांचा झालेला दिसतो.
आता अनेकांना प्रश्न पडेल की, अजितदादांना तर पहाटेच्या शपथविधीनंतर ठाकरे सरकारमध्ये उपमुख्यमंत्रीपद मिळालं, ठाकरेंचं सरकार गेल्यानंतर विरोधी पक्षनेतेपद मिळालं? मग अजितदादांचा गेम कसा? तर त्यासाठी आधी पवार अन् फडणवीसांची ताजी विधानं पाहायला हवीत.
आता अनेकांना प्रश्न पडेल की, अजितदादांना तर पहाटेच्या शपथविधीनंतर ठाकरे सरकारमध्ये उपमुख्यमंत्रीपद मिळालं, ठाकरेंचं सरकार गेल्यानंतर विरोधी पक्षनेतेपद मिळालं? मग अजितदादांचा गेम कसा? तर त्यासाठी आधी पवार अन् फडणवीसांची ताजी विधानं पाहायला हवीत.
या सगळ्या घटनाक्रमाची सुरुवात देवेंद्र फडणवीस यांनी दिलेल्या एका मुलाखतीमुळे झाली. एका वृत्तवाहिनीला मुलाखत देताना फडणवीसांनी म्हटले की, “अजित पवार आणि माझा पहाटेचा शपथविधी हा शरद पवारांच्या योजनेनुसारच झाला होता. मात्र, नंतर शरद पवारांनी दुहेरी खेळी करत आयत्या वेळी आपली भूमिका बदलली”. साहजिकच देवेंद्र फडणवीस यांच्या या वक्तव्याची जोरदार चर्चा झाली. यानंतर काहीवेळात शरद पवार यांनी एक पत्रकार परिषद घेतली. यावेळी त्यांनी २०१९ मध्ये सत्तास्थापनेच्या हालचाली सुरु असताना आपण नेमका काय डाव टाकला होता, हे पहिल्यांदाच जाहीर केले. “२०१९ साली भाजपसोबत सत्ता स्थापण्याबाबत चर्चा झाली होती. मात्र, ती चर्चा म्हणजे आमची राजकीय खेळी होती. मी क्रिकेट खेळत नसलो तरी राजकारणात मला कशी, कधी गुगली टाकायची हे माहित. फडणवीसांनी आपली विकेट गेली, हे मान्य करावं”, असे शरद पवार यांनी म्हटले.
आता खुद्द शरद पवारांनीच ही कबुली दिल्यावर प्रश्नच मिटला….एकीकडे अजितदादा अन् फडणवीसांच्या शपथविधीनंतर अवघ्या काही तासांत पत्रकार परिषद घेऊन आपला ह्यात काहीही हात नसल्याचं सांगणारे पवार आज ४ वर्षांनी हे धक्कादायक खुलासे करतायत खरे. पण प्रत्यक्षात याचा फटका त्यांच्याच माणसाला अधिक बसलाय…ते म्हणजे अर्थात अजित पवार.
Ajit Pawar: अजित पवारांना राग का आला, सर्वांदेखत जयंत पाटलांच्या प्रदेशाध्यक्षपदाचे महिने का मोजून दाखवले?अजितदादांना बसलेला मोठा फटका म्हणजे विश्वासघाताचा शिक्का. २०१९ अजितदादांनी पवारांचं ऐकून पाऊल उचलेलं असो, वा पवारांनी ही आयत्यावेळी घेतलेली माघार असो.. आजपर्यंत प्रश्नचिन्हं उभं राहतं ते अजितदादांच्या विश्वासार्हतेवरच. ४ वर्षात जेव्हा जेव्हा नवं सरकार स्थापन करण्याच्या चर्चा झाल्या तेव्हा अजितदादांचं नाव सगळ्यात पुढे. स्टॅम्पपेपरवर लिहून देतो, राष्ट्रवादी सोडत नसतो; असं कळकळीनं सांगून लक्ष अजितदादांवरच. त्यामुळे, कितीही मोठी पदं मिळाली तरी बसलेला शिक्का लाख प्रयत्नांनी खुद्द दादांनाही पुसता येईना, अशी परिस्थिती झाली आहे. या सगळ्याची कल्पना शरद पवारांना नसेल अशी शक्यता नाहीच…मग प्रश्न असाय की अजितदादांवर विश्वासघाताचा ठपका बसेल हे माहिती असूनही पवारांनी ही राजकीय खेळी का केली असावी? शरद पवार यांनी नवा गौप्यस्फोट केल्यापासून हा प्रश्न अजूनही अनेकांच्या मनात रुंजी घालत आहे. यावर आता शरद पवार किंवा अजित पवार काही बोलणार का, याकडे राजकीय वर्तुळाचे लक्ष लागले आहे.