• Sat. Sep 21st, 2024
मुंबईकरांचा प्रवास होणार अधिक सुलभ; बेस्टच्या ताफ्यात आणखी आठ एसी डबलडेकर बस दाखल

म. टा. खास प्रतिनिधी, मुंबई : आकर्षक आणि आरामदायी अशा आणखी आठ एसी डबलडेकर बस चालवण्याचा निर्णय बेस्ट उपक्रमाने घेतला आहे. या बस पुढील आठवड्यापासून दक्षिण मुंबईत विविध मार्गांवर चालवण्यात येणार आहेत. त्यामुळे डबलडेकर बसची एकूण संख्या बारा होणार आहे.

पहिल्या डबलडेकर एसी बसला ऑगस्ट, २०२२मध्ये मुख्यमंत्री एकनाथ शिंदे आणि केंद्रीय रस्ते वाहतूक महामार्गमंत्री नितीन गडकरी यांच्या हस्ते हिरवा झेंडा दाखवण्यात आला होता. सप्टेंबर, २०२२, त्यानंतर ऑक्टोबर आणि नंतर १४ जानेवारीच्या मुहूर्तावर या बस प्रवाशांच्या सेवेत येणार होत्या. मात्र डबलडेकर बसच्या चाचणीचे प्रमाणपत्र प्राप्त होण्यास विलंब झाल्याने त्यांचे आगमन लांबणीवर पडले. २१ फेब्रुवारीपासून ही बस दक्षिण मुंबईत धावू लागली. सुरुवातीला अशा दोन इलेक्ट्रिक डबलडेकर एसी बस ताफ्यात होत्या. त्यानंतर आणखी दोन बस सेवेत आल्या आणि दक्षिण मुंबईत धावणाऱ्या बसची संख्या चार झाली.

Monsoon 2023 : गुड न्यूज, पुढील आठवडा पावसाचा असणार, आयएमडीकडून अ‍ॅलर्ट जारी, विदर्भात मान्सून सक्रीय

एकूण ९०० डबलडेकर बस मुंबईत चालवण्याचा निर्णय बेस्ट उपक्रमाने घेतला आहे. त्यापैकी फेब्रुवारी अखेरपर्यंत आणखी चार ते पाच डबलडेकर आणि मार्चपर्यंत एकूण ५० डबलडेकर बस धावणार होत्या. मात्र यास विलंब झाला आहे. डबलडेकर बसमध्ये आसनक्षमता ६६ असून, उभ्याने दहा प्रवासी प्रवास करू शकतात. सीसीटीव्ही कॅमेरे, बसमधील दोन वाहकांना परस्पर संपर्कासाठी विशेष व्यवस्था, बसच्या दोन्ही बाजूंना स्वयंचलित दरवाजे असून, ८० मिनिटांत बसचे चार्जिंग होते.

सध्या बेस्ट उपक्रमाच्या सेवेत ३३ साध्या डबलडेकर बसही असून, त्या येत्या ऑक्टोबरपर्यंत कालबाह्य होणार आहेत. १५ ते १६ वर्षांपूर्वी बेस्टकडे ९०१ डबलडेकर बस होत्या. बसचे पंधरा वर्षांचे आयुर्मान, तांत्रिक समस्या इत्यादी कारणांमुळे याची संख्या हळूहळू कमी होऊ लागली. सन २०२२-२३मध्ये ४५ डबलडेकर बस होत्या. आता हीच संख्या ३३ असल्याची माहिती वरिष्ठ अधिकाऱ्याने दिली. यामध्ये मुंबई दर्शन घडवणाऱ्या तीन ओपन डेक बसही आहेत. साध्या बस कालबाह्य होतानाच त्या तुलनेने एसी डबलडेकर बसची संख्या मात्र वाढलेली नाही.

हे मार्ग निश्चित…

नव्याने ताफ्यात येणाऱ्या आठ एसी डबलडेकर बस पुढील आठवड्यात टप्प्याटप्प्याने धावणार आहेत. या बस सीएसएमटी, चर्चगेट, बॅक बे, गेट वे ऑफ इंडिया यासह दक्षिण मुंबईतील काही मार्गांवर चालवण्यात येणार असल्याची माहिती उपक्रमातील अधिकाऱ्यांनी दिली. डबलडेकर बसची संख्या वाढल्यानंतर त्या मार्गावरील प्रवाशांचा मिळणाऱ्या प्रतिसादाचा आढावा घेऊन काही सिंगलडेकर किंवा साध्या बसची संख्या कमी करण्याचाही विचार केला जाणार आहे.
Mumbai Local: बाहेर पडण्याआधी ही बातमी वाचा; उद्या या मार्गावर ब्लॉक तर काही फेऱ्या रद्द

Leave a Reply

Your email address will not be published. Required fields are marked *

You missed