म. टा. प्रतिनिधी, नाशिक : महाराष्ट्र शासनाच्या सामाजिक न्याय व विशेष सहाय्य विभागातर्फे दरवर्षी अनुसूचित जाती, नवबौद्ध प्रवर्गातील विद्यार्थ्यांना परदेश शिष्यवृत्ती देण्यात येत असते. २०२३-२४ या शैक्षणिक वर्षासाठी अर्जप्रक्रिया सुरू आहे. हे अर्ज भरण्यासाठी आज (दि. २०) पर्यंतची मुदत देण्यात आली आहे.राजर्षी शाहू महाराज शिष्यवृत्ती योजनेंतर्गत परदेश शिष्यवृत्ती प्रदान करण्यात येते. ही योजना अनुसूचित जातीच्या प्रवर्गातील विद्यार्थ्यांना पदव्युत्तर पदवी आणि संशोधनात्मक अभ्यासक्रमाचे (पीएच. डी.) विशेष अध्ययन करण्यासाठी आर्थिक मदत दिली जात आहे. योजनेसाठी जास्तीत जास्त विद्यार्थ्यांनी लाभ घेण्यासाठी अर्ज सादर करण्याचे आवाहन समाजकल्याण आयुक्त डॉ. प्रशांत नारनवरे यांनी केले आहे. अर्ज डाउनलोड करण्यासाठी www.maharashtra.gov.in या लिंकवर भेट द्यावी.

…अशी आहे योजना

– तीनशेच्या आत जागतिक विद्यापीठ रँकिंग असलेल्या परदेशी शिक्षण संस्थांमध्ये प्रवेश घेणाऱ्या ७५ विद्यार्थ्यांना शिष्यवृत्ती

– विद्यार्थ्यांनी अर्ज आवश्यक कागदपत्रांसह समाज कल्याण आयुक्तालय ३, चर्च पथ, महाराष्ट्र राज्य, पुणे-४११००१ या पत्यावर करावा

– योजनेसाठी पात्र असणाऱ्या विद्यार्थ्यांना विमानप्रवास भाडे, परदेशातील शैक्षणिक संस्थेची शिक्षणफी, निर्वाह भत्ता, आकस्मिक खर्चाचा लाभ

– पदव्युत्तर अभ्यासक्रमासाठी ३५ वर्षे व पीएच. डी. साठी ४० वर्षे ही कमाल वयोमर्यादा असेल.

– भारतीय आयुविज्ञान परिषदेच्या संकेतस्तळावरील एमडी व एमएल अभ्यासक्रमच प्रवेशासाठी पात्र असतील