दिव्यातील पदाधिकाऱ्यांचे बॅनर डोंबिवलीत झळकत असल्याने तो चर्चेचा विषय असताना भाजपा आणि शिंदे गटाचे येथे ही सूत जुळत नसल्याची चर्चा रंगू लागली आहे. दरम्यान याबाबत ठाण्याचे माजी उपमहापौर आणि शिंदे गटाचे दिवा शहरप्रमुख रमाकांत मढवी यांनी स्पष्टच सांगून टाकले की, दिव्यात शिवसेनेचे भाजपसोबत किती सख्य आहे हे सगळ्यांना माहीत आहे. विरोध करणारी भाजपा ही किती ही निमंत्रण दिले तरी येणार नाही. मग बॅनरवर तरी यांचे फोटो कशाला टाकायचे?, असा सवाल रमाकांत मढवी यांनी उपस्थित केला.
दिव्यात भाजप विरुद्ध शिवसेना
ठाणे महापालिकेत शिवसेना भाजपा युतीची सत्ता होती. मात्र, याच महापालिकेचा भाग असलेल्या दिवा शहरातील भाजपा आणि शिवसेना कार्यकर्ते कधीच एकत्र आले नाही. ते कायम एकमेकांच्या विरोधात बोलत आले आहेत. मुख्यमंत्री शिंदे यांच्या दौऱ्यात अनधिकृत बांधकामाचे प्रदर्शन भाजपाचे रोहिदास मुंडे हे भरवणार आहेत. तर दुसरीकडे कल्याण-डोंबिवली मध्ये मुख्यमंत्री एकनाथ शिंदे यांचे निकटवर्तीय समजले जाणारे भाजपाचे कॅबिनेट मंत्री रविंद्र चव्हाण व शिवसेना यांच्यात दरी निर्माण झाल्याचे बोलले जात आहे. कल्याण लोकसभेची जागा लढवण्याची तयारी भाजपकडून केली जात असल्याने या नाराजीत आणखी वाढ झाल्याचे बोलले जात आहे. कल्याण डोंबिवलीमध्ये शिवसेना भाजपाची युती आतापर्यंत अभेद्य असताना दिवा नंतर येथेही आता दोघांत बिनसल्याचे बोलले जात आहे.
डोंबिवलीतही भाजप विरुद्ध शिवसेना?
सार्वजनिक बांधकाम मंत्री रविंद्र चव्हाण यांचे निकटवर्तीय असलेले डोंबिवली भाजपचे पदाधिकारी नंदू जोशी यांच्यावर विनयभंग प्रकरणी दाखल झालेला गुन्हा हे या दोन पक्षातील वितुष्टाचे ताजे कारण ठरले आहे. जोशी यांच्यावर गुन्हा दाखल होताच भाजपने मानपाडा पोलिस ठाण्यात मोर्चा काढला. याला मनसे सुद्धा पाठींबा दिला आणि अवघ्या २४ तासातच मानपाडा पोलीस ठाण्याचे वरिष्ठ पोलीस निरीक्षक शेखर बागडे यांना सक्तीच्या रजेवर पाठविण्यात आले. खरे तर बागडे यांची बदलीच होईल अशी चर्चा डोंबिवलीत होती. मात्र बागडे यांना थेट ठाण्याहून ‘पाठबळ’ मिळाल्याने बदलीऐवजी त्यांची सक्तीच्या रजेवर सुटका करण्यात आल्याचे बोलले जाते. यानिमित्ताने डोंबिवलीकर चव्हाण आणि ठाणेकरांचे सूत काही केल्या जमत नसल्याच्या चर्चेने मात्र जोर धरला आहे. मागील नऊ- दहा महिन्यात तर शिंदे यांची शिवसेना आणि भाजप यांच्यात स्थानिक पातळीवर सातत्याने खटके उडत असून राज्यातील मंत्री मंडळात सहभागी असलेले रविंद्र चव्हाण यांनाही याची झळ पोहचू लागल्याने आता आम्हाला वाली कोण? असा सवाल जिल्ह्यातील भाजप नेते, पदाधिकारी दबक्या सुरात करु लागले आहेत.