मिळालेल्या माहितीनुसार, परभणीच्या मानवत शहरामध्ये राहणारी एक मुलगी उड्डाण पूल परिसरातून घराकडे जात होती. तिथे उपस्थित शेख शकीब शेक अहमद या रोडरोमिओने मुलीची छेड काढली. त्यानंतर तरूणीने त्याला जाब विचारत चोप देण्यास सुरुवात केली. यावेळी रस्त्याने जात असलेल्या नागरिकांनी मुलीला नेमके काय झाले आहे अशी विचारणा केली. पीडितेने घडलेले प्रकरण नागरिकांना सांगितल्यानंतर नागरिकांनीदेखील ओरोपीला चांगलाच चोप दिला. यावेळी मुलीने रोडरोमिओला बेल्टने मारहाण करून त्याच्या डोक्यातील प्रेमाचे भूत उतरवले.
रोडरोमिओच्या अंगावरील कपडे फाटेपर्यंत नागरिकांनी त्याला मारहाण केली. त्यानंतर त्याच्यावर गुन्हा दाखल करण्यासाठी मानवत पोलीस ठाण्यामध्ये घेऊन गेले. या ठिकाणी हुल्लडबाजावर गुन्हा दाखल करण्याची प्रक्रिया सुरू असल्याची माहिती मिळत आहे. दरम्यान मागील काही दिवसापासून शाळा महाविद्यालय आणि शिकवणीसाठी घराबाहेर पडणाऱ्या मुलींची छेड काढण्याचे प्रमाण परभणी जिल्ह्यामध्ये वाढले आहे. शिक्षणासाठी घराबाहेर पडणाऱ्या मुली खरंच सुरक्षित आहेत का, असा प्रश्न आता पालकांमधून उपस्थित केला जात आहे. या रोडरोमिओंवर कारवाई करण्यासाठी पोलीस प्रशासनाने योग्य त्या उपाययोजना कराव्यात, अशी मागणी पालकांमधून केली जात आहे.