चंद्रपूरचे काँग्रेस खासदार बाळू धानोरकर यांचं मंगळवारी ३० मे रोजी पहाटेच्या सुमारास निधन झालं. वयाच्या ४८व्या वर्षी त्यांनी अखेरचा श्वास घेतला. दिल्लीतील रुग्णालयात त्यांचं निधन झाल्याची बातमी पसरली आणि कार्यकर्त्यासह सर्वांनाच मोठा धक्का बसला. धानोरकर हे राज्यातील काँग्रेसचे एकमेव खासदार होते. बुधवारी ३१ मे रोजी त्यांच्या पार्थिवावर अंत्यसंस्कार करण्यात आले. अंत्यसंस्कारांआधी धानोरकरांच्या शवपेटीजवळ त्यांच्या एक कार्यकर्त्याने कविता सादर केली. यावेळी सर्व जनसमुदाय स्तब्ध झाला होता. हे दृश्य पाहून धानोरकरांना अखेरचा निरोप देण्यासाठी आलेल्या अनेक उपस्थितांच्या डोळ्यात पाणी आलं.