भाईंदर येथे राहणार्या प्रिती वागळे या तरुणीचं सोमवारी लग्न होतं. भाईंदर पश्चिमेच्या विनायक नगर येथील सभागृहात लग्न सोहळा सुरू होता. रात्री नऊ वाजता लग्नाचा मुहूर्त होता. सगळे जण वधूची वाट बघत होते. तयारी करून रात्री सव्वा आठच्या सुमारास नवरी मुलगी आपल्या तीन बहिणी आणि दोन लहान बाळांसोबत पहिल्या मजल्यावर जाण्यासाठी निघाली. मात्र अचानक लिफ्ट बंद पडली.
ऐनवेळी लिफ्ट बंद पडल्याने मोठा बाका प्रसंग उद्भवला. लिफ्ट अडकल्याचे संकट एकीकडे तर दुसरीकडे लग्नाचा मुहूर्त चुकण्याची भीती. त्यामुळे कुटुंबीयांचा जीव टांगणीला लागला. या प्रसंगाची माहिती अग्निशमन दलाला मिळताच त्यांनी घटनास्थळी धाव घेतली. पालिकेच्या सार्वजनिक बांधकाम विभागातील कर्मचारीही पोहोचेले. २० मिनिटांच्या प्रयत्नानंतर लिफ्टमध्ये अडकलेल्या वधूसह इतरांची सुटका कऱण्यात आली आणि तिचे लग्न सुखरूप पार पडले. लिफ्टमध्ये अडकलेल्या इतर महिलांना रुग्णालयात दाखल करावे लागले. आम्हाला घटनेची माहिती मिळताच लिफ्टमध्ये अडकलेल्या महिलांची सुखरूप सुटका केली अशी माहिती अग्निशमन विभागाचे मुख्य अधिकारी प्रकाश बोराडे यांनी दिली आहे.