समीर वानखेडे यांनी आपल्या याचिकेत स्वत:विरोधातील सर्व आरोप नाकारले आहेत. माझ्यावर यापूर्वीही भ्रष्टाचाराचे आरोप करण्यात आले होते. तेव्हा मुंबई पोलिसांनी चौकशी केली होती. तेव्हा माझ्याविरोधात कोणतेही पुरावे सापडले नव्हते. सीबीआयने दाखल केलेल्या गुन्ह्यातही माझ्याविरोधात काहीच सापडणार नाही. पण आर्यन खान प्रकरणात सध्या माझ्याविरोधात सुरु असलेली कारवाई ही सुडापोटी असल्याचा दावा समीर वानखेडे यांनी केला आहे. समीर वानखेडे यांनी आपल्या याचिकेवर तातडीने सुनावणी घेण्याची मागणी केली होती. न्यायालयाने ही मागणी मान्य केली होती.
समीर वानखेडेंनी कॉर्डिलिया क्रुझ प्रकरणातील दोन संशयितांना सोडलं?
ज्ञानेश्वर सिंह यांच्या नेतृत्त्वाखाली करण्यात आलेल्या एनसीबीच्या चौकशीत अहवालात आर्यन खान ड्रग्ज प्रकरणाबाबत अनेक प्रश्न उपस्थित करण्यात आले आहेत. या प्रकरणात कॉर्डिलाय क्रुझवरून पकडण्यात आलेल्या सौम्या सिंग आणि सिद्धार्श शहा यांना एनसीबीने सोडून दिले. सौम्या सिंग आणि मॉडेल मुनमुन धमेचा कॉर्डिलिया क्रुझवर एकाच खोलीत होते. सौम्या सिंगच्या बॅगमध्ये रोलिंग पेपरही सापडला होता. तर सिद्धार्थ शहा याने आपण अरबाज मर्चंटला चरस पुरवल्याची कबुली दिली होती. त्यावेळी सिद्धार्थ शहाकडे ६ ग्रॅम चरसही सापडले होते. तरीही एनसीबीने या दोघांना सोडून दिले. त्यामुळे समीर वानखेडे यांनी या दोघांच्या कुटुंबीयांकडून पैसे घेऊन त्यांना सोडून दिल्याचा संशय आहे.