मुंबई : अभिनेते शाहरुख खान याच्याकडे २५ कोटी रुपयांची लाच मागितल्याच्या आरोपांवरून अमली पदार्थ नियंत्रण कक्ष अर्थात एनसीबीचे माजी संचालक समीर वानखेडे यांच्यावर केंद्रीय अन्वेषण विभाग (CBI) ने गुन्हा दाखल केला आहे. या पार्श्वभूमीवर समीर वानखेडे यांनी आपल्या वकिलांमार्फत मुंबई हायकोर्टात याचिका दाखल करत सीबीआयने दाखल केलेल्या एफआयआरला आव्हान दिलं. त्यावर आज झालेल्या सुनावणीनंतर कोर्टाने समीर वानखेडे यांना २२ मेपर्यंत अटकेपासून संरक्षण दिलं आहे. कोर्टाच्या या निर्णयाने वानखेडेंना तात्पुरता दिलासा मिळाला आहे.समीर वानखेडे यांच्या वतीने आज रिजवान मर्चंट यांनी कोर्टात बाजू मांडली. ‘गुन्हा घडल्यानंतर चार महिन्यांच्या आतमध्ये एफआयर दाखल करणं अपेक्षित असतं. मात्र २०२१ साली घडलेल्या एका प्रकरणात कोणताही गुन्हा केलेला नसताना वानखेडे यांच्यावर आता एफआयआर दाखल करण्यात आला असल्याने हे एफआयआर बेकायदेशीर आहे,’ असं मर्चंट यांनी म्हटलं. तर दुसऱ्या बाजूने सीबीआयकडून कुलदीप पाटील यांनी या याचिकेला विरोध केला. पाटील यांनी म्हटलं की, ‘प्रशासकीय अधिकाऱ्याच्या तपासासाठी केंद्र सरकारकडून आम्ही परवानगी मागितली. ही परवानगी आल्यानंतर दोन दिवसांतच आम्ही याप्रकरणी एफआयर दाखल केला आहे. तसंच समीर वानखेडे हे अटकपूर्व जामीनही मागू शकतात.’
कोर्टाने दोन्ही बाजू ऐकून घेतल्यानंतर याप्रकरणी पुढील सुनावणी २२ मे रोजी ठेवली आहे. तोपर्यंत समीर वानखेडेंवर अटकेची कारवाई करण्यात येऊ नये, असे आदेश देण्यात आले आहेत.
समीर वानखेडे यांनी शाहरुख खानसोबतचे चॅट का जोडले?
समीर वानखेडे यांनी कोर्टात दाखल केलेल्या याचिकेसोबत अभिनेता शाहरुख खान आणि एनसीबीचे अधिकारी ज्ञानेश्वर सिंह यांच्यासोबत व्हॉट्सअॅपवर केलेल्या संभाषणाचे पुरावेही जोडले आहेत. याबाबत माहिती देताना वानखेडे यांचे वकील रिजवान मर्चंट यांनी सांगितलं की, ‘शाहरुख खान याने एका सामान्य वडिलांप्रमाणे समीर वानखेडे यांच्याकडे आपल्या मुलाची काळजी घेण्याची विनंती केली. मात्र या दोघांमध्ये कुठेही पैशांचा व्यवहार झाला नाही. तसं असतं तर व्हॉट्सअॅप चॅटमध्येही त्याचा उल्लेख आला असता. तसंच आर्यन खान यानेही कोर्टात दिलेल्या प्रतिज्ञापत्रात माझी कोणत्याही तपास अधिकाऱ्याविषयी तक्रार नसल्याचं म्हटलं होतं. मात्र त्यानंतरही वानखेडे यांच्याविरोधात गुन्हा दाखल करण्यात आला आहे,’ असा दावा मर्चंट यांनी केला.
दरम्यान, समीर वानखेडे यांनी गुरुवारी केंद्रीय अन्वेषण विभागाच्या चौकशीसाठी हजर राहणे अपेक्षित होते. मात्र, त्यांनी चौकशीकडे पाठ फिरवली. या प्रकरणात वानखेडे यांच्याविरोधात ‘एफआयआर’ दाखल झाल्यावर गुरुवारी चौकशीला सामोरे जाण्याची तयारी त्यांनी दर्शवली होती. मात्र, प्रत्यक्षात ते अन्वेषण विभागाच्या कार्यलयात आलेच नाहीत.