रायगड, खोपोली : जुना मुंबई पुणे द्रुतगती महामार्ग जणू मृत्यूचा सापळा बनला असून या महामार्गावरील अपघातांचे सत्र सुरूच आहे. शनिवारी रात्री उशिरा झालेल्या क्रेन व कारच्या भीषण अपघातात एकाचा जागीच मृत्यू झाला आहे.या अपघातात खोपोली जवळील चिंचवली गावातील संजय जाधव यांनी अपघातात जागीच प्राण सोडले.जुन्या मुंबई पुणे राष्ट्रीय महामार्गावर हाळ बुद्रुक गावाच्या हद्दीत रिलायन्स पेट्रोल पंपासमोर शनिवार दिनांक १३ मे रोजी रात्री ११.०० वाजेच्या सुमारास एका ब्रेझा कारने समोरील क्रेनला जोरदार धडक दिली. खोपोलीहून पनवेलच्या दिशेने जाणारी ब्रेझा कार क्रमांक एम.एच ४६ ऐयु १७४३ जात असताना रिलायन्स पेट्रोल पंप येथे आली असता पेट्रोल पंपमध्ये जाणाऱ्या क्रेन क्रमांक.एम एच ४६ बीके २१९५ ब्रेझा कारचालकाचे कारवरील नियंत्रण सुटल्याने कारने समोरील क्रेनला जोरदार धडक दिली.
या अपघातात खोपोली जवळील चिंचवली गावातील कारचालक संजय जाधव (वय वर्ष ५०) हे मयत झाले आहेत. धडक इतकी जोरदार होती की कारचा चक्काचूर झाला आहे. या अपघातामुळे महामार्गावर काही वेळ वाहतूक कोंडी झाली होती.
क्रेनच्या साहाय्याने कारला रस्त्यावरून बाजूला करण्यात आले. त्यानंतर वाहतूक सुरळीत करण्यात आली. या अपघाताची माहिती मिळताच रस्ते अपघात टीमचे सदस्य हानीफ करजीकर, खालापूर पोलीस व ग्रामस्थांनी मदतीसाठी घटनास्थळी धाव घेतली. या अपघाताप्रकरणी खालापूर पोलीस अधिक तपास करत आहेत.
