म. टा. प्रतिनिधी, छत्रपती संभाजीनगर : ‘कर्नाटकात भाजपची सत्ता होती. तेव्हा ४० टक्के कमिशनचा मुद्दा गाजला. निवडणुकीत देवाचे नाव वापरु नये, असा नियम आहे. मात्र, भाजपने कर्नाटक विधानसभा निवडणुकीत बजरंग बलींचे नाव पुढे केले. कर्नाटक विधानसभा निवडणुकीचा निकाल पवनपुत्र हनुमान यांचा वार असलेला शनिवारीच लागला. निकालात बजरंग बलीनींच भाजपला चारी मुंड्या चीत केले आहे,’ असा टोला काँग्रेस प्रदेशाध्यक्ष नाना पटोले यांनी शनिवारी लगावला.कर्नाटक विधानसभा निवडणूक निकालानंतर शनिवारी सायंकाळी पटोले शहरात आले. भडकलगेट येथील भारतरत्न डॉ. बाबासाहेब आंबेडकर यांच्या पूर्णाकृती पुतळ्यास त्यांनी अभिवादन केले. त्यानंतर गुलमंडी येथील श्री क्षेत्र सुपारी हनुमान मंदिरात दर्शन घेतले आणि आरती केली. त्यानंतर पत्रकारांशी बोलताना पटोले म्हणाले, ‘कर्नाटकात काँग्रेसने महगाई, बेरोजगारी, शेतकऱ्यांचे प्रश्न; तसेच नागरिकांना होत असलेल्या अडचणींचे प्रश्न उपस्थित केले. दुसऱ्या बाजूने पंतप्रधान जाहीर भाषणांमधून देवाचे नाव पुढे करीत होते. मात्र, कर्नाटकच्या जनतेने भाजपला जागा दाखवून दिली.’ ‘काँग्रेस नेते राहुल गांधी, राष्ट्रीय अध्यक्ष मल्लिकार्जुन खर्गे यांच्या नेतृत्वाला कर्नाटकातील जनतेने स्वीकारले आहे. भविष्यात देशात आणि महाराष्ट्रात असा विजय मिळविण्यासाठी आम्ही कटिबद्ध आहोत,’ असे त्यांनी नमूद केले.

या वेळी काँग्रेस शहराध्यक्ष शेख युसूफ, ॲड. सय्यद अक्रम, शिवसेना उद्धव बाळासाहेब ठाकरे पक्षाचे जिल्हाध्यक्ष किशनचंद तनवाणी, माजी महापौर नंदकुमार घोडेले आदींची उपस्थिती होती.

कर्नाटकात भाजपचे मनसुबे धुळीला, काँग्रेस बहुमताच्या दिशेने; संजय राऊतांनी मोदी-शाहांच्या जखमेवर मीठ चोळलं
‘मीही दिला शब्द’

‘काँग्रेस नेत्या सोनिया गांधी यांना मी महाराष्ट्रात काँग्रेससाठी काम करण्याचा शब्द दिला आहे. आगामी काळातील निवडणुकांसाठी महाविकास आघाडीतील अन्य पक्षांशी चर्चा करून जागावाटपाचे योग्य ते सूत्र ठरविण्यात येईल. प्रत्येक निवडणुकांमध्ये यश मिळवण्याचा आमचा प्रयत्न असेल,’ असे नाना पटोले यांनी स्पष्ट केले.