नागपूर : जिन्सच्या पँटमध्ये पेस्ट स्वरूपातील सोने लपवून आणण्याचा प्रकार उघडकीस आला आहे. या प्रकरणी एका प्रवाशाकडून मंगळवारी १.८ कोटी किमतीचे जवळपास सोने जप्त करण्यात आले आहे.
केंद्रीय सीमा शुल्क विभागाने प्राप्त माहितीच्या आधारे ही कारवाई केली. प्रवाशाने पेस्ट स्वरूपातील सोने सात पॅकेटमध्ये जीन्स पॅन्टच्या आतील भागात स्टीच करून लपवून ठेवले होते. हा प्रवासी कतार एअरवेजच्या विमानाने ९ मे रोजी पहाटे २:३० वाजता दोहा येथून नागपुरात आला होता.
प्राप्त माहितीच्या आधारे अधिकाऱ्यांनी या प्रवाशाची कसून चौकशी आणि तपासणी केली. त्याने सोने लपवून आणल्याची कबुली दिली. प्रवाशाने सोने कुणाकडून आणले, नागपुरात कुणाला देणार होता, याची चौकशी करण्यात येत आहे. त्याने सीमाशुल्क १९६२ कायद्याचे उल्लंघन केले असून, त्याअंतर्गत त्याच्यावर कार्यवाही करण्यात येणार असल्याचे अधिकाऱ्यांनी सांगितले.
चार अधिकाऱ्यांचा चमू प्रवाशाची चौकशी करीत आहे. ही कारवाई केंद्रीय सीमाशुल्क आयुक्त अभयकुमार यांच्या मार्गदर्शनाखाली आणि अतिरिक्त आयुक्त पीयूष पाटील यांच्या नेतृत्वात सहायक आयुक्त/एआययू अविनाश पांडे आणि पाच अधिकाऱ्यांनी केली.
धक्कादायक! NEET परीक्षेत मुलींच्या थेट अंतर्वस्त्रांची केली तपासणी, उघड्यावर कपडे बदलण्यास भाग पाडले
फेब्रुवारीनंतर दुसरी घटना
गो फर्स्टच्या विमानातील टॉयलेटमध्ये ४० लाखाचे सोने लपवून सोने आणण्याचा प्रकार फेब्रुवारी महिन्यात घडला होता. त्यावेळी सीमा शुल्क विभागाने यशस्वीरीत्या कारवाई केली होती. त्यानंतर आता हा प्रकार उघडकीस आला आहे.