म. टा. प्रतिनिधी, पुणे: विमाननगर भागात मसाज पार्लरच्या नावाखाली सुरू असलेला वेश्याव्यवसायाचा प्रकार गुन्हे शाखेच्या सामाजिक सुरक्षा विभागाने उघडकीस आणला. पोलिसांनी पार्लरवर छापा टाकून सहा तरुणींना ताब्यात घेतले असून, व्यवस्थापकासह चार जणांविरोधात गुन्हा दाखल करण्यात आला आहे.या प्रकरणी पोलिस नाईक इम्रान नदाफ यांनी विमानतळ पोलिस ठाण्यात तक्रार दिली. त्यानुसार मसाज सेंटरचा व्यवस्थापक मणीकंठ राहुल नायडू (वय २०, रा. थेरगाव, पिंपरी-चिंचवड), विशाल अग्रवाल आणि अन्य दोघांवर गु्न्हा दाखल केला आहे. नायडूला पोलिसांनी अटक केली आहे. विमाननगर भागात ‘अमायरा स्पा’ नावाच्या पार्लरमध्ये मसाजच्या नावाखाली वेश्याव्यवसाय सुरू असल्याची माहिती सामाजिक सुरक्षा विभागाला मिळाली. त्यानंतर पोलिसांच्या पथकाने बनावट ग्राहकाच्या माध्यमातून परिस्थितीची खात्री करून घेतली आणि छापा टाकला. मसाज सेंटरमधून रोकड आणि मोबाइल असा एक लाख २८ हजार ५०० रुपयांचा मुद्देमाल जप्त करण्यात आला. अतिरिक्त आयुक्त रामनाथ पोकळे, उपायुक्त अमोल झेंडे यांच्या मार्गदर्शनाखाली सामाजिक सुरक्षा विभागाचे वरिष्ठ निरीक्षक भरत जाधव, सहायक निरीक्षक अश्विनी पाटील, बाबा कर्पे, अजय राणे, इम्रान नदाफ, इरफान पठाण, रेश्मा कंक, ओंकार कुंभार आदींनी ही कारवाई केली.
साईंच्या शिर्डीत हे काय चाललंय? पोलिसांकडून हायप्रोफाईल सेक्स रॅकेट उघड, १५ तरुणींची सुटका
आयुर्वेद उपचार केंद्रात वेश्याव्यवसाय
सिंहगड रस्त्यावरील माणिकबाग परिसरात आयुर्वेद उपचार केंद्राच्या नावाखाली सुरू असलेल्या वेश्याव्यवसाय सामाजिक सुरक्षा विभागाने उघडकीस आणला. पोलिसांनी छापा टाकून दोन महिलांना ताब्यात घेतले. आयुर्वेद उपचार केंद्राच्या मालकासह दोघांविरोधात गु्न्हा दाखल करण्यात आला. माणिकबाग परिसरात आयुर्वेद उपचार केंद्राच्या नावाखाली वेश्याव्यवसाय सुरू असल्याची माहिती सामाजिक सुरक्षा विभागाला मिळाली होती. केंद्रात बनावट ग्राहक पाठवून पोलिसांनी खातरजमा केली आणि तेथे छापा टाकला. मोबाइल आणि रोख रक्कम असा एक लाख ५२ हजार रुपयांचा मुद्देमाल जप्त केला. या प्रकरणी सिंहगड रस्ता पोलिस ठाण्यात गुन्हा दाखल करण्यात आला आहे.
