खडकपाडा पोलीस ठाण्याच्या हद्दीत मोहने परिसरात एका घरामध्ये अज्ञात आरोपीने दिवसा घरफोडी करुन सुमारे ३५ तोळे सोन्याचे चोरी केली होती. याबाबत खडकपाडा पोलीस ठाण्यात गुन्हा गुन्हा नोंद करण्यात आला होता. तसेच, गेल्या महिनाभरात दिवसा घरफोडी करण्याच्या घटना परिसरात सतत घडत होत्या, त्याबाबतही पोलीस ठाण्यात गुन्हे नोंद करण्यात आले होते.

दिवसा घरफोडी करुन चोरी करण्याच्या वाढत्या घटनांमुळे परिसरातील लोकांच्या मनामध्ये भिती निर्माण झाली होती. परिसरातील उपलब्ध सीसीटीव्ही फुटेज तसेच तांत्रिक कौशल्याच्या आधारे प्राप्त माहितीनुसार गुन्हा घडल्यानंतर पोलीस ठाण्याच्या तपास पथकाचे अधिकारी आणि अंमलदार यांनी ८ एप्रिल रोजी शहाड, कल्याण पश्चिम परिसरात सापळा रचून एका संशयित व्यक्तीला शिताफीने ताब्यात घेतलं.

भावाच्या साखरपुड्यात DJवर नाचत होता, अचानक कोसळला, कुटुंबीयांना वाटलं बेशुद्ध झाला पण..
या व्यक्तीकडे चौकशी केली असता त्याने ठाणे जिल्ह्यात मोहने, आंबिवली, टिटवाळा, शहापूर परिसरात दिवसा घरफोडी करुन गुन्हे केल्याचे सांगितले. तसेच, हा आरोपी दिवसा घरफोडी करणारा सराईत गुन्हेगार असुन तो वॉचमन नसलेल्या इमारतीत दिवसा एकटा घुसून घरफोडी करत असे. अटक आरोपीताकडून नमूद केलेले एकूण ८ गुन्हे उघडकीस आणले आहेत. त्याच्याकडून ४७ तोळे (४७० ग्रॅम) सोन्याचे दागिने, १ लॅपटॉप, १ मोबाईल फोन, दोन महागडी घड्याळ हस्तगत करण्यात खडकपाडा पोलीस ठाण्यास यश मिळाले आहे.