म. टा. प्रतिनिधी, ठाणे : मुख्यमंत्री एकनाथ शिंदे यांनी निवडणूक आयोगाने ‘शिवसेना’ हे नाव आणि ‘धनुष्यबाण’ हे अधिकृत पक्षचिन्ह दिल्यानंतर मंत्री, आमदार आणि सहकाऱ्यांना घेऊन अयोध्या दौऱ्यावर जाणार असल्याची घोषणा केली होती. त्यामुळे या दौऱ्याबद्दल शिवसैनिकांमध्ये कुतूहल निर्माण झाले होते. पाच दिवसांपूर्वी मुख्यमंत्री शिंदे यांनी ९ एप्रिल ही अयोध्यादौऱ्याची तारीख घोषित केली. त्यानंतर अल्पावधीतच तयारी करून शुक्रवारी दीड हजार शिवसैनिकांची विशेष रेल्वे गाडी अयोध्येच्या दिशेने रवाना झाली. मुख्यमंत्री शिंदे आणि डॉ. श्रीकांत शिंदे यांनी या गाडीला ठाणे स्थानकात भगवा झेंडा दाखवला. या दौऱ्याची घोषणा झाल्यानंतर मागील पाच दिवसांपासून मुंबई, नवी मुंबई, ठाणे, दिवा, कल्याण-डोंबिवली, अंबरनाथ आणि बदलापूरपासून ते पालघरपर्यंत पदाधिकाऱ्यांना तयारीच्या सूचना देण्यात आल्या होत्या. त्यानुसार पहिली रेल्वेगाडी ठाणे स्थानकातून सोडण्यात आली. यावेळी कल्याण डोंबिवलीचे खासदार डॉ. श्रीकांत शिंदे, आमदार रवींद्र फाटक, नवी मुंबई महापालिकेचे माजी विरोधी पक्षनेते विजय चौगुले, ठाणे जिल्हा महिला संघटिका मीनाक्षी शिंदे, कल्याण जिल्हाप्रमुख गोपाळ लांडगे यांच्यासह शिवसेनेचे ठाणे जिल्ह्यातील सर्व प्रमुख पदाधिकारी आणि कार्यकर्ते मोठ्या संख्येने उपस्थित होते. या गाडीतून शिवसेनेने अयोध्येसाठी शिवसैनिकांची ठाण्यातून कुमक धाडल्याची चर्चा यानिमित्त सुरू झाली आहे.

‘चिन्ह मिळाल्याने अयोध्येत’

‘प्रभू श्रीरामाच्या आशीर्वादाने आम्हाला धनुष्यबाण हे निवडणूक चिन्ह मिळाले असून, त्याबद्दल श्रीरामाचे आशीर्वाद घेण्यासाठी आम्ही सर्वजण अयोध्येला जात आहोत. अयोध्या हा आमच्यासाठी श्रद्धेचा विषय आहे. तिथे भव्य राममंदिर उभारले जावे, ही स्वर्गीय हिंदुहृदयसम्राट बाळासाहेब ठाकरे यांची इच्छा होती. हे स्वप्न आज पूर्ण होत असून, या मंदिराचे निर्माणकार्य आम्हाला ‘याची देही याची डोळा’ पाहता येणार आहे’, असे या विशेष गाडीला भगवा झेंडा दाखवून अयोध्येकडे रवाना केल्यानंतर मुख्यमंत्री शिंदे यांनी माध्यमांशी बोलताना नमूद केले. तसेच, मंत्रिमंडळातील सहकारी मंत्री, आमदार, खासदार आणि शिवसैनिकांच्या सोबत रामलल्लाचे दर्शन घेणार असल्याचेही ते म्हणाले.