नवी मुंबई शहर स्वच्छते प्रमाणेच शहर सुशोभिकरणाकडेही नवी मुंबई महानगरपालिका विशेष लक्ष देते. सानपाडामधील स्पोर्ट्स कॉम्प्लेक्स जेष्ठ नागरिक लहान मुलांसाठी पर्वणीच ठरलं आहे. नवी मुंबई शहरातील दुर्लक्षित पडीक जागेचा कायापालट करण्यावर पालिकेने भर दिला आहे. सानपाडा विभागातील सेक्टर १५ परिसरातील उड्डाणपुलाखालील पडीक जागेवर महापालिकेने भव्य ‘स्पोर्ट्स कॉम्प्लेक्स’ ची उभारणी केली आहे. ही जागा विविध क्रीडा प्रकारांसाठी उपयोगात येत असल्याने परिसरातील नागरिकांकडून, विद्यार्थ्यांकडून या उपक्रमाचं विशेष कौतुक करण्यात येत असून सर्वांसाठी एक आकर्षक ठरलं आहे. सानपाडा येथील मोकळ्या आणि पडीक जागेचा नियोजनबद्ध आणि सेवापूर्ती भावनेने वापर करून नवी मुंबई मनपाच्या अभियांत्रिकी विभागाने स्थानिक लोकप्रतिनिधिंच्या संकल्पनेतून उभारलेल्या अँपी स्पोर्ट्स कॉम्प्लेक्सचा क्रीडाप्रेमी जेष्ठ नागरिक, महिला आणि बच्चे कंपनी मनमुराद आनंद घेत असून हे सानपाडावासियांसाठी एक पर्वणी ठरलं आहे.

पडीक जमिनीचा योग्य वापर

सानपाडा येथील बहुचर्चित पाम बीच विभाग हाय फाय एरिया म्हणून सुपरिचित आहे. सानपाडा पूर्वेला असणाऱ्या या विभागात एकूण ९ सेक्टर्स आहेत. इथे केवळ एकच सार्वजनिक उद्यान आणि एक छोटेखानी मैदान असून ३० हजारांहून अधिक लोकसंख्या असणाऱ्या या परिसरासाठी ते अपुरं आहे. येथील नागरिकांना क्रीडा विषयक भेडसावणारी जागेची कमतरता लक्षात घेता, सानपाडा पाम बीच विभाग आणि सानपाडा नोड्स यांना जोडणाऱ्या ओव्हरब्रिज खालील मोकळ्या आणि पडीक जमिनीचा योग्य वापर व्हावा, क्रीडाप्रेमींना खेळता यावं ही गरज लक्षात घेऊन स्थानिक नगरसेविका वैजयंती दशरथ भगत यांनी अँपी स्पोर्ट्स कॉम्प्लेक्स निर्माण व्हावं यासाठी नवी मुंबई मनपा प्रशासनाकडे पाठपुरावा केला.

कसं आहे अँपी स्पोर्ट्स कॉम्प्लेक्स

पडीक जागेवर स्पोर्ट्स कॉम्प्लेक्स निर्माण करताना पालिकेने उड्डाणपूलाखालील २७४५.२७ चौ.मी. जागेमध्ये जमिनीपासून उड्डाणपूलाच्या उंचीनुसार सुयोग्य खेळांची निवड केली. त्या जागेचे खेळांनुसार विविध विभाग करण्यात आले. ज्याठिकाणी उंची जास्त आहे अशा विभागात बास्केटबॉल कोर्ट आणि बॅडमिंटनचे ३ कोर्ट निर्माण करण्यात आले. त्याचप्रमाणे २२ यार्डचे पीच असलेला बॉक्स क्रिकेटचा झोन तयार करण्यात आला. तसंच ३०.६१ × १४.०० मी. आकाराची स्केटिंग रिंक सुविधा उपलब्ध करून देण्यात आली. याशिवाय योगसाधना करण्यासाठी सुविधा उपलब्ध करण्यासोबतच या स्पोर्ट्स कोर्ट्सच्या परिसरात जॉगिंग ट्रॅक विकसित करण्यात आला आहे.

सानपाडावासियांसाठी मोठी पर्वणी

सानपाडा सेक्टर १५ मधील उड्डाणपुलाच्या खाली कचऱ्याचा ढीग आणि डेब्रिजचे प्रमाण हटवून पालिकेच्या माध्यमातून त्या जागेवर बास्केटबॉल, बॉक्स क्रिकेट, स्केटिंग आणि जॉगिंग ट्रॅक आणि बॅडमिंटन कोर्ट तयार करण्यात आलं आहे. सानपाडा शहरासह आजूबाजूच्या विभागातील मुलांना या स्पोर्ट्स कॉम्प्लेक्सचा मोठ्या प्रमाणावर उपयोग होणार असल्यामुळे नागरिकांनी समाधान व्यक्त केलं आहे. तसंच या जागेवर ज्येष्ठ नागरिक आणि इतरांना विरंगुळ्याचं साधन म्हणून त्याठिकाणी परिसर सुशोभिकरण करून बसण्यासाठी बेंचेसची सुविधा उपलब्ध करण्यात आली आहे. उड्डाण पुलाच्या खाली असलेल्या पडीक जागेवर चांगला उपक्रम राबवण्यात आला असून सुंदर रंगरंगोटी केल्यामुळे नागरिकांनी आनंद व्यक्त केला आहे.

भव्य ‘स्पोर्ट्स कॉम्प्लेक्स’ ची उभारणी

नवी मुंबई शहर स्वच्छते प्रमाणेच शहर सुशोभिकरणाकडे नवी मुंबई महानगरपालिका विशेष लक्ष देत असल्याचं पाहायला मिळालं. नवी मुंबई शहरातील दुर्लक्षित पडीक जागांचा कायापालट करण्यावर पालिका भर देत आहे. सानपाडा विभागातील सेक्टर १५ परिसरातील उड्डाणपुलाखालील पडीक जागेवर महापालिकेने भव्य ‘स्पोर्ट्स कॉम्प्लेक्स’ ची उभारणी केली आहे. ही जागा विविध क्रीडा प्रकारांसाठी उपयोगात येत असल्याने परिसरातील नागरिकांकडून, विद्यार्थ्यांकडून या उपक्रमाचं विशेष कौतुक करण्यात येत आहे.

जागेचा लोकोपयोगी कायापालट

सानपाडा शहरातील सेक्टर १५ येथे नागरी वस्तीतील उड्डाणपूलाखालील दुर्लक्षित, पडीक जागेवर कचरा, डेब्रीज टाकले जात होते. त्यामुळे येथील वातावरण अस्वच्छ होते. त्याचप्रमाणे त्या जागेचा असामाजिक कारणांसाठी गैरवापर केला जात होता. त्यामुळे स्थानिक नागरिकांकडून ही जागा सुशोभित करण्याची सातत्याने पालिकेकडे मागणी केली जात होती. स्थानिक नागरिकांच्या मागणीनुसार पालिकेने स्वच्छ सर्वेक्षणांतर्गत या जागेचं सुशोभिकरण करून तिचं सुव्यवस्थित रुपांतर करत ही जागा विविध गोष्टींसाठी वापरण्याचा निश्चय केला. त्यानुसार महानगरपालिकेच्या अभियांत्रिकी विभागाकडून याठिकाणी विविध खेळांच्या सुविधा उपलब्ध करून देऊन त्या जागेचा लोकोपयोगी कायापालट करण्याचं नियोजन करण्यात आलं असून या जागेवर स्पोर्ट्स कॉम्प्लेक्सची उभारणी करण्यात आली आहे.