नेमकं प्रकरण काय?

एका ३५ वर्षीय गृहिणीला फोनवरून अत्यंत गलिच्छ भाषेत शिवीगाळ करत, घरातून उचलून नेण्याची आणि बलात्काराची थेट धमकी दिल्याचा संतापजनक प्रकार सिडको परिसरातील एन-6, अविष्कार कॉलनी येथे समोर आला आहे. या प्रकरणी सिडको पोलीस ठाण्यात संशयित आरोपीविरोधात गंभीर स्वरूपाचा गुन्हानोंदवण्यात आला आहे.

नेमका वाद काय?

गजानन रामदास पाटील असे गुन्हा दाखल झालेल्या आरोपीचे नाव आहे. हा आरोपी 34 वर्षांचा आहे. तो जळगावच्या पाचोरा येथील डोंगरगावचा रहिवासी आहे. पोलिसांनी दिलेल्या माहितीनुसार, 30 ऑगस्ट रोजी सकाळी साडेनऊ वाजेच्या सुमारास आरोपी गजानन याने पीडित गृहिणीच्या मोबाईलवर संपर्क साधला. गावाच्या भंडारामध्ये माझ्या पत्नीच्या नावापुढे तुझ्या गावाचे नाव का घेतले? असा किरकोळ जाब विचारत त्याने फोनवर वाद घालण्यास सुरुवात केली.

पीडितेचे समजावण्याचा प्रयत्न, आरोपीकडून थेट धमकी

पीडितेने समजावून सांगण्याचा प्रयत्न केला असता, आरोपीचा पारा चढला. त्याने गृहिणीला फोनवरूनच अत्यंत अश्लील आणि गलिच्छ भाषेत शिवीगाळ करण्यास सुरुवात केली. वाद एवढ्यावरच थांबला नाही, तर तुला तुझ्या घरातून उचलून नेईन आणि तुझ्यावर बलात्कार करेन, अशी थेट धमकी आरोपीने दिली. या अचानक घडलेल्या प्रकारामुळे भयभीत झालेल्या गृहिणीने तात्काळ कुटुंबीयांशी चर्चा करून सिडको पोलीस ठाणे गाठले.

Eknath Shinde : भाषणावेळी मराठा आंदोलकांची घोषणाबाजी, एकनाथ शिंदे यांचं जरांगेंचा उल्लेख करत भावनिक भाष्य

सिडको पोलिसांत गुन्हा दाखल

पीडित गृहिणीने दिलेल्या तक्रारीवरून सिडको पोलिसांनी आरोपी गजानन पाटील याच्याविरुद्ध भारतीय न्याय संहितेतील संबंधित कलमांनुसार गुन्हा नोंदवला आहे. महिलांविरोधातील अशा गुन्ह्यांमुळे परिसरात तीव्र संताप व्यक्त केला जात आहे. पोलीस अंमलदार जगताप या प्रकरणाचा पुढील सखोल तपास करत असून जळगावच्या आरोपीला ताब्यात घेण्यासाठी पोलीस पथक रवाना होण्याची शक्यता आहे.