“अमित ठाकरे यांच्यावर गुन्हा दाखल करा. पंतप्रधान नरेंद्र मोदींचा अपमान करण्याचं काम त्यांनी केलं. ते मनसेचे नवे नवे झालेले नेते आहेत. फोटोबाबत हा प्रोटोकॉल असतो, प्रोटोकॉलच्या माध्यमातून हे सगळं होतं. ते शासकीय कॉलेज आहे. त्यांनी फोटो काढण्याच्या आधी प्रोटोकॉल वाचायला हवा होता. ते नव्याने घराच्या बाहेर पडले आहेत, घरात बसणाऱ्यांना प्रोटोकॉल माहिती नसतो. भारतीय पंतप्रधानांचा फोटो प्रत्येक शासकीय कार्यालयात असतो,” अशी भूमिका भाजपचे प्रवक्ते नवनाथ बन यांनी मांडली आहे.

भाजप शहराध्यक्षांचा हल्लाबोल

भाजपचे पुणे शहराध्यक्ष धीरज घाटे यांनीही अमित ठाकरे यांच्यावर टीका केली आहे. “एखाद्या महाविद्यालयात छत्रपती शिवाजी महाराजांच्या शेजारी देशाचे पंतप्रधान नरेंद्र मोदी यांचा फोटो लावला असेल तर तो लावण्यामागे काही वेगळा हेतू असेल असे मला वाटत नाही. आपल्या सगळ्यांचे दैवत छत्रपती शिवाजी महाराज आहेत. तसेच या देशाचे पंतप्रधान नरेंद्र मोदी यांचे देखील दैवत छत्रपती शिवाजी महाराज हे आहेत. छत्रपती शिवाजी महाराज यांच्याबद्दल आपल्या सगळ्यांच्या मनात आत्मीयता आहे. नरेंद्र मोदी हे देशाचे पंतप्रधान आहेत आणि ते संविधानिक पद आहे, त्यामुळे फोटो लावला म्हणून राजकारण करणे, हे योग्य नाही. मनसे चुकीच्या पद्धतीचे राजकारण करत आहे. पंतप्रधान नरेंद्र मोदींचा फोटो काढून तो प्रसिद्धी माध्यमांवर झळकवायचा आणि प्रसिद्धी मिळवायची हे कुठेतरी थांबवलं पाहिजे, यातून मिळणारी प्रसिद्धी क्षणभंगुर असते,” असा टोला घाटे यांनी लगावला आहे.