‘फिटनेस सर्टिफिकेट’संभ्रम

या ‘फिटनेस सर्टिफिकेट’बाबत काहीच माहिती नसल्याने गणेशोत्सव समितीकडे प्रश्नांची सरबत्ती सुरू झाली होती. मात्र गणेशमूर्तींसाठी ‘फिटनेस सर्टिफिकेट’ अनिवार्य करण्याबाबत कोणतेही निर्देश दिलेले नाहीत, असे मुंबई महापालिकेने स्पष्ट केले आहे. त्यामुळे या प्रमाणपत्राबाबत निर्माण झालेला संभ्रम दूर झाला आहे.

चर्चा सोशल मीडियावर सुरू

एक टनापेक्षा अधिक वजनाच्या गणेशमूर्तींसाठी फिटनेस प्रमाणपत्र बंधनकारक होणार, तसेच मूर्तीच्या जडणघडणीपासून वितरणापर्यंतची माहिती नोंदविणे आवश्यक राहील, अशा चर्चा सोशल मीडियावर सुरू झाल्या होत्या. त्यामुळे हे फिटनेस सर्टिफिकेट नेमके काय, ते कुठून घ्यायचे, मूर्ती पूर्ण तयार झाल्यानंतर सांगाड्याची तपासणी कशी होणार, तपासणीसाठी कोण येणार आणि अर्ज कुठे करायचा, अशा प्रश्नांची सरबत्ती गणेशोत्सव समन्वय समितीच्या पदाधिकाऱ्यांकडे सुरू झाली होती.

गणेशभक्तांनी अफवांवर विश्वास ठेवू नये

मात्र, महापालिकेने अशा कुठल्याही प्रकारच्या प्रमाणपत्राबाबत कोणतेही निर्देश दिले नसल्याचे स्पष्ट केले. ‘महापालिकेच्या अधिकाऱ्यांशी चर्चा केल्यानंतर गणेशमूर्तींसाठी फिटनेस प्रमाणपत्राबाबत कोणतेही निर्देश देण्यात आलेले नाहीत. त्यामुळे मंडळांनी आणि गणेशभक्तांनी अशा अफवांवर विश्वास ठेवू नये’, असे बृहन्मुंबई सार्वजनिक गणेशोत्सव समन्वय समितीचे अध्यक्ष ॲड. नरेश दहिबावकर यांनी सांगितले.

Mumbai News : भांडुपमध्ये दहाव्या मजल्यावरुन नवविवाहिता पडली, पण झाडावर अडकून बचावली; मांडीत फांदी घुसली, फायर ब्रिगेडने कौशल्याने उतरवलं

मुंबईतील जवळपास ५० टक्के गणेशमूर्ती मंडपांमध्ये पोहोचल्या

अखिल सार्वजनिक उत्सव समितीचे उपाध्यक्ष अमित कोकाटे यांनीही मंडळांच्या अडचणींकडे लक्ष वेधले. ‘मुंबईतील जवळपास ५० टक्के गणेशमूर्ती मंडपांमध्ये पोहोचल्या आहेत. अशा वेळी आता फिटनेस तपासणी कशी करणार, असा प्रश्न मंडळांकडून सातत्याने विचारला जात होता’, असे त्यांनी सांगितले. पूर्ण घडलेल्या मूर्तीतील वेल्डिंग कसे तपासणार, मोठ्या मूर्तींचे वजन कसे मोजणार आणि तपासणीसाठी कोणत्या यंत्रणेकडे जायचे, अशा अनेक शंका मंडळांनी उपस्थित केल्याचेही त्यांनी नमूद केले.

Devendra Fadnavis :पुणे-चाकण परिसरात उद्योगांना बळ ; २,३२० कोटींची गुंतवणूक,मुख्यमंत्री देवेंद्र फडणवीसांनी केला विश्वास व्यक्त

प्रश्न मंडळे आणि मूर्तिकारांकडून उपस्थित

मूर्तींचे फिटनेस सर्टिफिकेट मिळवले तरी रस्त्यांची खात्री कोण देणार, असा प्रश्न मंडळे आणि मूर्तिकारांकडून उपस्थित करण्यात आला. मूर्ती यथायोग्य घडवण्याची जबाबदारी मूर्तिकार घेतात; मात्र मूर्ती ने-आण करताना रस्त्यांवरील खड्ड्यांमुळे धोका निर्माण होतो. त्यामुळे रस्ते खड्डेमुक्त असतील, याची किमान पाच वर्षांची हमी द्यावी, अशी मागणी मूर्तिकार सिद्धेश दिघोळे यांनी केली.

समर्पक शब्दप्रयोग हवा

आयत्या वेळी असे निर्णय घेतले जाऊ नयेत,अशी अपेक्षाही मंडळांनी व्यक्त केली. तसेच, ‘गणेशमूर्तींचा फिटनेस’या शब्दप्रयोगाबाबतही काही मंडळे आणि गणेशभक्तांनी नाराजी व्यक्त केली. सणाचे पावित्र्य राखणारा अधिक समर्पक शब्दवापरला जावा, अशी अपेक्षा त्यांनी व्यक्त केली.