नेमकं प्रकरण काय?

मिळालेल्या माहितीनुसार, विशाखा राऊत यांनी आपलं जात प्रमाणपत्र निवडणुकीआधी सबमीट केलं होतं. पण हे जात प्रमाणपत्र बरोबर नसल्याचा ठपका जात पडताळणी समितीकडून ठेवण्यात आला आहे. विशाखा राऊत यांनी याआधी खुल्या प्रवर्गातून निवडणूक लढवली होती. पण वर्षभरापूर्वी पार पडलेल्या निवडणुकीत त्यांनी जात प्रमाणपत्र दाखवून निवडणूक कशी लढवली? असे काही तांत्रिक मुद्दे उपस्थित करण्यात आले आहेत.

विशाखा राऊत यांच्याकडे तीन महिन्यांचा कालावधी

जिल्हाधिकारी कार्यालयातून विशाखा राऊत यांचं नगरसेवक पद रद्द करण्याचा निर्णय घेण्यात आल्यानंतर आता हे प्रकरण मुंबई महापालिका आयुक्त अश्विनी भिडे यांच्याकडे येईल. यानंतर हे प्रकरण सभागृहात येईल. इथे या विषयावर महापौर रितू तावडे या निर्णय घेऊ शकतात. असं असलं तरी विशाखा राऊत यांच्याकडे अजून तीन महिन्यांचा कालावधी आहे. या काळात त्या कोर्टामध्ये अपील करु शकणार आहेत. तांत्रिक गोष्टी पाहून विशाखा राऊत या काय पाऊल उचलतात ते पाहणं महत्त्वाचं आहे.

राऊत याचं पद रद्द झाल्यास प्रिया सरवणकर यांना मिळू शकते संधी

विशाखा राऊत या ज्येष्ठ नगरसेविका आहेत. त्या मुंबईच्या महापौर राहिलेल्या आहेत. तसेच आमदारदेखील राहिल्या आहेत. 1999 ते 2004 या काळात त्यांनी दादर विधानसभा या महत्त्वाच्या मतदारसंघाच्या आमदार म्हणून प्रतिनिधित्व केलं आहे. सध्या त्या ठाकरे गटाच्या नगरसेविका आहेत. माजी आमदार सदा सरणकर यांच्या कन्या प्रिया सरवणकर यांनी विशाखा राऊत यांच्या विरोधात निवडणूक लढवली होती. विशाखा राऊत यांचं नगरसेवक पद रद्द झालं तर प्रिया सरवणकर यांना नगरसेवक पद मिळू शकतं, अशी चर्चा राजकीय वर्तुळात सुरु आहे. तसं घडल्यास उपमुख्यमंत्री एकनाथ शिंदेंच्या नगरसेवकांच्या संख्येत एका नगरसेवकाने वाढ होईल.

विशाखा राऊत काय म्हणाल्या?

विशाखा राऊत यांनी या कारवाईवर प्रतिक्रिया दिली आहे. “मला तीन महिनांला कालावधी आहे. मी तीन महिन्यात मी अपील करु शकते. माझं पद आताच रद्द झालेलं नाही. अजून तीन महिन्यांचा कालावधी आहे”, असं विशाखा राऊत म्हणाल्या. “माझ्या पंजोबाचे 1911 पासूनचे कागदपत्रे आहेत. माझी जात कुणबी आहे हे त्या कागदपत्रांमधून सिद्ध होतं. पण शिंदे गटाने जात पडताळणी समितीवर दाबव टाकला आणि अवैध ठरवण्यास सांगितलं आहे”, असा आरोप विशाखा राऊत यांनी केला आहे.