मिळालेल्या माहितीनुसार, सुखबीरसिंग बादल पंजाब राज्याचे माजी उपमुख्यमंत्री तथा अकाली दलाचे प्रमुख आहेत. बुधवारी ते खासदार पत्नी हरसीमनकौर बादल आणि कुटुंबातील सदस्यासह सचखंड गुरुद्वारा दर्शनासाठी नांदेडला तीन दिवसाच्या दौऱ्यावर आले होते. गुरुद्वारामध्ये बादल कुटुंबीयाकडून पाठ ठेवण्यात आले होते. दरम्यान आज दुपारी २ वाजेच्या सुमारास सुखबीरसिंग बादल हे आपल्या कुटुंबियासह नांदेड शहरापासून जवळ असलेल्या माता साहेब गुरुद्वारा दर्शनासाठी गेले होते. यावेळी त्यांच्यासोबत पोलिसांचा मोठा बंदोबस्त तैनात होता.

दर्शन करून खाली उतरत असताना पायरीवर एक वृद्ध व्यक्ती त्यांच्या जवळ आला. साधारण: ६० वर्ष वय असणारा हा व्यक्ती आपल्याशी आपल्याशी काहीतरी बोलण्याचा प्रयत्न करतोय, असं वाटल्याने सुखबीरसिंग बादल तिथे थांबले. मात्र सदर व्यक्तीने अचानक हल्ला करण्याचा प्रयत्न केला. खंजरने होणारा हा हल्ला रोखताना बादल यांच्या उजव्या हाताला जखम झाली आहे. बादल यांच्यावरील हल्ल्यानंतर हल्लेखोराने सुरक्षा दलातील पोलीस निरीक्षकावर देखील हल्ला केल्याची माहिती आहे.

दरम्यान, पंजाबचे माजी उपमुख्यमंत्री बादल यांच्यावर हल्ला झाल्याने खळबळ उडाली आहे. वृद्ध व्यक्तीने बादल यांच्यावर हल्ला का केला, या हल्ल्यामागील कारण काय होते, हे अद्याप स्पष्ट झालेलं नाही. हल्ल्यानंतर सुखबीरसिंग बदल यांना नांदेड येथील खाजगी रुग्णालयात उपचारासाठी दाखल करण्यात आलं असून त्यांची प्रकृती स्थिर असल्याचं सांगण्यात येत आहे.