नाशिकमध्ये बनावट नोटा छापणाऱ्या टोळीला पोलिसांनी बेड्या ठोकल्या आहेत. नाशिक त्र्यंबकेश्वर रोड येथे ही कारवाई करण्यात आली आहे. बनावट नोटा छापण्याचे साहित्य जप्त करण्यात आले आहे. पोलिसांकडून 5 संशयितांना अटक करण्यात आली आहे.

नाशिक ग्रामीण आणि शहर पोलीस दलाकडून नाशिक त्रंबकेश्वर रोडवर संयुक्तिक कारवाई करण्यात आली. यावेळी बनावट नोटांचा कारखाना उद्ध्वस्त करण्यात आला आहे. या कारवाईमध्ये लाखो रुपयांच्या बनावट नोटा पोलिसांनी जप्त केल्या आहेत.

तळेगावमधील बंगल्यात सुरु होता प्रकार

या कारवाईत नोटा छापण्याचं साहित्य आणि सामग्री जप्त करण्यात आले आहे. पोलिसांनी 5 जणांना अटक केली आहे. त्र्यंबकेश्वर रोडवरील तळेगाव गावात एका बंगल्यात हा नोटा छापण्याचा अड्डा सुरू असल्याची माहिती समोर आली आहे. नाशिक ग्रामीण विभागाचे पोलीस अधीक्षक डॉ. डी. एस. स्वामी यांच्या मार्गदर्शनाखाली नाशिक ग्रामीण पोलिसांनी ही मोठी कारवाई केली आहे.

विचित्र क्लृप्ती वापरुन बनावट नोटा तयार केल्या जायच्या

या कारखान्यात संशयितांकडून चलनी नोटा एका विशिष्ट केमिकलमध्ये बुडवून त्या नोटांची शाई कागदावर वटवून बनावट नोटा ह्या तयार केल्या जात होत्या. तर दहा लाख रुपयांच्या चलनी नोटांच्या बदल्यात तीस लाख रुपयांच्या बनावट नोटा देताना पोलिसांनी ही कारवाई केली असल्याची माहिती पोलिसांकडून देण्यात आली आहे.

‘या’ आरोपींना अटक

अमरेश्वर आईथा (तेलंगणाचा रहिवासी), दासरी सत्यइ (तेलंगणाचा रहिवासी), गोकुळ दाते (तळेगाव नाशिकचा रहिवासी), हिरामण दाते (तळेगाव नाशिकचा रहिवासी), मच्छिंद्र घनदाट (सातपूर नाशिकचा रहिवासी) या पाच संशयित आरोपींना नाशिक ग्रामीण पोलिसांनी केली अटक केले आहे.

पोलिसांकडून सखोल तपास सुरु

या रॅकेट मागे आणखी काही मोठे धागेदोरे हाती लागण्याची शक्यता आहे. पोलिसांकडून अधिक तपास केला जात आहे. आता या संपूर्ण प्रकरणी आणखी काय बाबी समोर येतात? हे बघणे महत्त्वाचे असणार आहे.