मुंबई: मुंबई शहर आणि परिसरामध्ये मागील काही वर्षांपासून शाकाहारी आणि मांसाहारी वाद उफाळून येत असल्याचं पाहायला मिळतं. अशातच या वादात एका नव्या व्हिडिओने भर घातली आहे. मुंबई शहरातील ताडदेव परिसरात विक्रीस असणाऱ्या एका फ्लॅटची जाहिरात करणाऱ्या तरुणाचा व्हिडिओ व्हायरल झाला आहे. या व्हिडिओत सदर तरुण सुरुवातीला या फ्लॅटची लवकर विक्री व्हावी, यासाठी त्याचे फायदे आणि वैशिष्ट्ये सांगताना दिसत आहे. मात्र शेवटी या तरुणाने फ्लॅट विक्रीसाठी मालकाची एक अट असल्याचं सांगितलं आहे. तुम्ही नॉन व्हेज खात असाल तर इथं तुम्हाला घर मिळणार नाही, असं या तरुणाने म्हटल्याने वाद निर्माण झाला असून विविध राजकीय पक्षांनीही तीव्र संताप व्यक्त केला आहे.

भावेश कावरे या इस्टेट एजंट तरुणाने हा व्हिडिओ तयार केला होता. मांसाहार चालणार नसल्याच्या अटीवरून वाद निर्माण झाल्यानंतर कावरे याने पळवाट शोधण्याचा प्रयत्न केला आहे. हा फ्लॅट एका वारकऱ्याचा असल्याने त्यांनी तशी अट टाकल्याचा दावा भावेश कावरे याने स्पष्टीकरण देताना केला आहे. “जे घर विक्रीला होते, त्याचा मालक मराठीच होता. मात्र ते वारकरी संप्रदायातील असल्याने शाकाहारी व्यक्तीला घर विकावे, अशी त्यांची श्रद्धा होती. हे घर एका मराठी माणसानेच विकत घेतले आहे. मी देखील मराठी असून माझे चिकनचे दुकान आहे. व्हिडिओमध्ये मी कुठेही मराठी असा उल्लेख केला नव्हता. पण काही राजकीय लोक विनाकारण वाद निर्माण करत आहेत,” असा आरोप भावेश कावरे याने केला आहे.

मनसेचा इशारा

मुंबईतील तरुणाचा हा व्हिडिओ समोर आल्यानंतर मनसेने आक्रमक इशारा दिला आहे. “महाराष्ट्र नवनिर्माण सेनेच्या पद्धतीने या व्यक्तीचा समाचार घेतला जाईल,” असं मनसेचे नगरसेवक यशवंत किल्लेदार यांनी म्हटलं आहे. तसंच शिवसेना उद्धव बाळासाहेब ठाकरे पक्षाच्या मुंबई महापालिकेतील गटनेत्या किशोरी पेडणेकर यांनीही तिखट प्रतिक्रिया दिली आहे. “मी आताच त्या मुलाची रील पाहिली. त्याचं नाव कावरा की काय आहे. आम्ही त्याला बावरा करू,” असा हल्लाबोल पेडणेकर यांनी केला आहे.

दरम्यान, मांसाहार करणाऱ्या व्यक्तींना घर देऊ नये, असा कोणताही कायदा महाराष्ट्र सरकार किंवा मुंबई महापालिकेचा नाही, अशी प्रतिक्रिया मुंबई महापौर संजय घाडी यांनी दिली आहे.