महाराष्ट्र एकीकरण समितीने खानापूर येथे २००६ साली सीमा प्रश्नासंदर्भात मेळावा घेतला होता. यावेळी महाराष्ट्रातील नेते या मेळाव्याला उपस्थित होते. मेळाव्यात रामदास कदम आणि नितीन बानगुडे पाटील यांनी कर्नाटक शासनावर भाषणातून हल्लाबोल केला होता. प्रक्षोभक भाषण केल्याप्रकरणी त्यांच्यावर खानापूर पोलीस स्थानकात गुन्हा दाखल करण्यात आला होता. भारतीय दंडसंहिता कलम १५३ आणि १५३/ए अन्वये हा गुन्हा दाखल केला होता. या गुन्ह्याची सुनावणी पूर्ण होऊन खानापूर न्यायालयाने रामदास कदम आणि नितीन बानगुडे पाटील यांची मंगळवारी निर्दोष मुक्तता केली आहे. वकील शामसुंदर पत्तार, हेमराज बेंच्चन्नावर यांनी त्यांच्या वतीने काम पाहिले.

दरम्यान, रामदास कदम आणि नितीन बानगुडे पाटील हे आधी सुनावणीला हजर राहिले नाहीत. त्यामुळे खानापूर न्यायालयाने या दोघांवर अटक वॉरंट जारी केले होते. यावेळी समिती कार्यकर्ते यशवंत बिरजे आणि महादेव घाडी हे कोर्टात जामीन राहिले होते. त्यानंतर खानापूर न्यायालयाने रू. १० लाख रूपयांच्या जामीनावर रामदास कदम यांना सोडले होते. आता या दोन्ही नेत्यांची पुराव्याअभावी मुक्तता करण्यात आली आहे.