मुंबई, दि. २१ : मंडणगड येथील प्रस्तावित औद्योगिक क्षेत्राचा विकास वेगाने करण्यासाठी आवश्यक असलेली भूसंपादन प्रक्रिया, कंटूर सर्व्हे, पायाभूत सुविधांचे नियोजन आणि उद्योग गुंतवणूक आकर्षित करण्यासाठीची सर्व कामे प्राधान्याने पूर्ण करण्यात यावीत, असे निर्देश उद्योगमंत्री डॉ. उदय सामंत यांनी महाराष्ट्र औद्योगिक विकास महामंडळाच्या (एमआयडीसी) अधिकाऱ्यांना दिले.

उद्योगमंत्री डॉ.सामंत यांच्या मंत्रालयीन दालनात झालेल्या बैठकीस महसूल राज्यमंत्री योगेश कदम यांच्यासह एमआयडीसीचे मुख्य कार्यकारी अधिकारी दिपेंद्रसिंह कुशवाह आणि दूरदृश्यप्रणालीद्वारे सिंधुदुर्ग जिल्हाधिकारी कार्यालयाचे वरिष्ठ अधिकारी उपस्थित होते. या बैठकीत मंडणगड औद्योगिक क्षेत्रासंदर्भात भूसंपादन, पूर्वी अधिसूचित झालेल्या जमिनींची सद्यस्थिती, शेतकऱ्यांच्या मागण्या, कंटूर सर्व्हेचा प्रलंबित अहवाल तसेच नवीन औद्योगिक क्षेत्राच्या विकासाचा सविस्तर आढावा घेण्यात आला.

मंडणगड येथे प्रस्तावित औद्योगिक क्षेत्रासाठी सुरुवातीला १०० एकर क्षेत्राचा प्रस्ताव होता. त्यामध्ये वाढ करून सुमारे १५० एकर क्षेत्रात पहिल्या टप्प्यात औद्योगिक क्षेत्र विकसित करण्याचा निर्णय बैठकीत कायम ठेवण्यात आला. यासाठी करण्यात आलेल्या कंटूर सर्व्हेचा अंतिम अहवाल प्राप्त करण्याचे निर्देश त्यांनी दिले.

डॉ. सामंत यांनी सांगितले की, कंटूर सर्व्हे पूर्ण होताच भूसंपादन, रस्ते, पाणीपुरवठा आणि अन्य पायाभूत सुविधांच्या विकासाची प्रक्रिया टप्प्याटप्प्याने सुरू करण्यात यावी. दोन वर्षांपासून प्रलंबित असलेल्या या प्रकल्पाला आता गती देणे आवश्यक असून कोणत्याही प्रशासकीय कारणामुळे कामे रखडू नयेत, असेही त्यांनी सांगितले.

बैठकीत मंडणगडच्या भौगोलिक स्थानाचा लाभ घेत मोठ्या उद्योगांना आकर्षित करण्याबाबतही चर्चा झाली. रायगड जिल्ह्याच्या औद्योगिक पट्ट्याला लागून असल्याने मंडणगडमध्ये उद्योगविकासाची मोठी क्षमता असून गुंतवणूकदारांशी सकारात्मक संवाद साधून उद्योग उभारणीसाठी आवश्यक सर्व सहकार्य देण्यात येईल, असे डॉ. सामंत यांनी सांगितले. तसेच उद्योग उभारणीसाठी आवश्यक प्रोत्साहन, सवलती आणि पायाभूत सुविधा उपलब्ध करून देण्यासाठी शासनामार्फत आवश्यक ती कार्यवाही करण्यात येईल, असेही उद्योगमंत्री डॉ. उदय सामंत यांनी यावेळी स्पष्ट केले.

0000

संजय ओरके/विसंअ