अन्न व औषध प्रशासनाचे अधिकारी आणि मुंबई गुन्हे शाखा युनिट-11 चे पोलीस अधिकारी यांनी संयुक्त विद्यमाने गोरेगाव येथे पहाटे चार वाजेच्या सुमारास कांदिवली पश्चिमेत छापा टाकला. यावेळी आरोपी हे दुधाच्या पिशव्यांमध्ये छेडछाड करत असल्याचे अधिकाऱ्यांच्या निदर्शनास आले. पोलीस आणि एफडीएच्या अधिकाऱ्यांनी आरोपींना रंगेहाथ पकडलं. यावेळी आरोपी कशाप्रकारे दुधाच्या पिशव्यांसोबत छेडछाड करायचे तेदेखील अधिकाऱ्यांनी कॅमेऱ्यात कैद केलं.

दोन विक्रेत्यांवर कारवाई

या कारवाईत कृष्णा लिंगमपल्ली (वय ४८ वर्षे) आणि रवी पाटीकाका (वय ४५ वर्षे) या दोन दूध विक्रेत्यांवर कारवाई करण्यात आली. हे दोन्ही आरोपी गोरेगाव पश्चिमेतील प्रेमनगर येथे वास्तव्यास आहेत. या कारवाईमध्ये 822 दूधाच्या पिशव्या (एकूण 558 लिटर), अंदाजे 39,503 रुपये किंमतीचा साठा जप्त करून नष्ट करण्यात आला. तपासणीदरम्यान दूधाच्या पिशव्यांमध्ये छेडछाड करून त्यांची विक्री केली जात असल्याचे निदर्शनास आले.

आरोपींवर गुन्हा दाखल

या प्रकरणी गोरेगाव पोलीस ठाणे येथे गुन्हा दाखल करण्यात आला आहे. भारतीय न्याय संहिता (BNS) कलम २७४, ३४५(३), ३४७(१), ३१८(४), ३३६(३), ३(५) तसेच अन्न सुरक्षा व मानके अधिनियम, २००६ मधील कलम २६, २७, ३१ सह कलम ५९ व ६३ अंतर्गत गुन्हा दाखल करण्यात आला आहे. सदर कारवाईत दोन आरोपींना अटक करण्यात आली आहे.

गोवंडीतही मोठी कारवाई

एफडीएने गोवंडी येथे देखील दुग्ध व्यवसायिकाविरुद्ध कारवाई केली. एफडीएने गोवंडी येथील डेअरीवर धाड टाकली. यावेळी तपासणीदरम्यान संबंधित अन्न व्यवसायिकाकडून स्टेनलेस स्टील मिल्क चिलिंग टँकमध्ये तसेच प्लास्टिकच्या पिशव्या आणि कॅनमध्ये सैल पाश्चराईज्ड म्हशीचे दूध साठवून त्याची विक्री केली जात असल्याचे निदर्शनास आले.

नियमांचे उल्लंघन केल्याचे स्पष्ट

सदर विक्री ही मा. आयुक्त (अन्न), महाराष्ट्र राज्य यांच्या आदेश क्र. FDA/COMM/FOOD/MILK/७१३-२०२६/०७, ३ जुलैमधील तरतुदींचे उल्लंघन करणारी असल्याचे आढळले. सदर आदेशानुसार पाश्चराईज्ड दूधाची विक्री केवळ सीलबंद, आवश्यक लेबलयुक्त पॅकेजमध्येच करण्यास परवानगी आहे.

१६८३ लीटर सैल पाश्चराईज्ड म्हशीचे दूध नष्ट

तपासणीदरम्यान विक्रीसाठी ठेवलेले एकूण १,६८३ लीटर सैल पाश्चराईज्ड म्हशीचे दूध (१,५०० लिटर मिल्क चिलिंग टँकमध्ये आणि १८३ लिटर प्लास्टिक पिशव्या/कॅनमध्ये) आढळून आले. या साठ्याची अंदाजे किंमत १,०७,७१२ रुपये इतकी होती. हा सर्व साठा जागेवर नष्ट करण्यात आला. एकूण १,६८३ लीटर दूध जलनिस्सारण व्यवस्थेमध्ये सोडून जागेवरच नष्ट करण्यात आले.

थेट व्यवसाय बंद करण्याची नोटीस

यावेळी पाश्चराईज्ड म्हशीच्या सैल दुधाचा एक नमुना प्रयोगशाळीय विश्लेषणासाठी घेण्यात आला असून, प्रयोगशाळेचा अहवाल प्राप्त झाल्यानंतर आवश्यक ती पुढील कायदेशीर कार्यवाही करण्यात येणार आहे. तसेच, अधिकाऱ्यांच्या पूर्वपरवानगीने संबंधित आस्थापनास व्यवसाय बंद नोटीस बजावण्यात आली आहे. अन्न सुरक्षा व मानके अधिनियम, २००६ मधील कलम २६ व २७ सह कलम ५२ अन्वये पुढील कायदेशीर कार्यवाही सुरू करण्यात आली आहे.