कुटुंबाला आधार देणारा लेक

अनियंत्रित बेस्ट बसच्या धडकेमध्ये नियाजला नाहक जीव गमवावा लागला. तो उत्तर प्रदेशच्या बहराइच या गावातील रहिवासी होता. महिनाभरापूर्वी त्याने ‘स्विगी’मध्ये डिलिव्हरी बॉयचे काम सुरू केले होते. डिलिव्हरी केल्या जाणाऱ्या पार्सलनुसार त्याला पैसे मिळायचे. नियाज वरळी येथे भाड्याच्या घरात त्याच्या मित्रासोबत राहत होता. पाचेक वर्षांपासून त्याने मुंबईमध्ये विविध प्रकारची कामे केली.

गावी मुलगी पाहायला जाणार होता

सुरुवातीला तो कांदे-बटाटे पोहोचवण्याचे काम करायचा. अधिक पैसे मिळावेत यासाठी त्याने स्विगी-इन्स्टामार्टमध्ये डिलव्हरी बॉयचे काम स्वीकारले. त्याच्या वडिलांची प्रकृती बिघडल्यामुळे ते काम करू शकत नाहीत. या महिन्यात नियाज लग्नासाठी गावी मुलगी पाहायला जाणार होता. बहिणीच्या शिक्षणाची, लग्नाची जबाबदारीही त्याच्यावर होती. या भीषण अपघाताने त्याच्या कुटुंबाचा आधार हिरावून घेतला. प्रशासनाने आर्थिक मदत करून कुटुंबाला आधार द्यावा अशी, अशी मागणी नियाजचे काका रोज अली यांनी केली.

२१ वर्षांच्या ऋषभची मृत्यूशी झुंज

या अपघातात २१ वर्षीय ऋषभ गुप्ता हादेखील गंभीररित्या जखमी झाला आहे. त्याच्या डोक्याला इजा झाली असून, तो मृत्यूशी झुंज देत आहे. ऋषभवर महापालिकेच्या शीव येथे अतिदक्षता विभागात उपचार सुरू आहेत. त्याची प्रकृती चिंताजनक असल्याचे डॉक्टरांनी सांगितले. महापौर रितू तावडे, बेस्ट समितीच्या अध्यक्ष तृष्णा विश्वासराव यांनी रुग्णालयात भेट देऊन ऋषभच्या प्रकृतीची विचारपूस केली. तसेच, त्याची आई रामा गुप्ता, इतर नातेवाइकांही भेट घेऊन धीर दिला.
Kerala Accident : पती-पत्नीचा अपघातात अंत, ऐनवेळी कार बदलल्याने चिमुरडी बचावली; शोकाकुल बॉस दुबईहून निघाला, कुटुंबाने अंत्यविधी थांबवून ठेवले
ऋषभच्या उपचाराचा सर्व खर्च प्रशासनाच्या वतीने केला जाईल. त्याच्या उपचारात सर्वतोपरी दक्षता घ्यावी, अशा सूचना त्यांनी रुग्णालय प्रशासनाला दिल्या. तसेच, संबंधित बेस्ट बस कंत्राटदाराला तेथूनच थेट दूरध्वनी करून गुप्ता कुटुंबीयांना दोन लाख रुपयांची तत्काळ मदत करण्याची सूचना महापौर आणि बेस्ट समितीच्या अध्यक्षांनी केल्याचे ऋषभच्या नातेवाइकांनी सांगितले.

अपघातात तिकीट निरीक्षक सतीश वाघमारे यांना छाती व कमरेला दुखापत झाली आहे. बसचे वाहक राजेंद्र पेलेकर यांचा हात फ्रॅक्चर झाला असून, चालक विकास पदारेंच्या पायाला दुखापत झाली आहे. तसेच, बेस्ट निरीक्षक महेश डोईफोडे (५०) आणि पादचारी अमित म्हात्रे (४१) यांनाही यात दुखापत झाली आहे.

महिला पोलीस कॉन्स्टेबलला वाचवलं

दरम्यान, ‘बसवरील नियंत्रण सुटल्यानंतर चालकाने शिवाजी पार्कच्या दिशेने न जाता बस उजव्या बाजूला वळवली. यामुळे कोतवाल गार्डनजवळील गाड्यांना धडक बसली. मात्र, वळणामुळे वेग कमी होऊन मोठा अनर्थ टळला. यातचही त्याने एका महिला पोलिस कॉन्स्टेबलला वाचवण्याचा प्रयत्न केला’, असे मदतकार्यासाठी पोहोचलेल्यांपैकी एक असलेल्या अमित चव्हाण यांनी सांगितले.

नेमके काय झाले हे कळलेच नाही. प्लाझा येथे बसमध्ये चढलो. काही कळायच्या आत जोरात आपटलो. पाठ आणि हाताला जोरात धक्का बसला आणि मार लागला. चालकाचे बसवरचे नियंत्रण अचानक सुटल्याने हा प्रसंग ओढावला, असे तिकीट निरीक्षक सतीश वाघमारे यांनी ‘महाराष्ट्र टाइम्स’शी बोलताना सांगितले.
DU Professor Murder : खुनासाठी 1400 किमी प्रवास, संशय टाळण्यासाठी 13 वर्षांच्या मुलाची ढाल, दिल्लीच्या प्राध्यापिकेला संपवणाऱ्या जोडप्याचा पर्दाफाश

आम्ही काय उत्तर देणार?

अपघातानंतर बसचे वाहक व तिकीट तपासनीस उपचारानंतर रुग्णालयातून बाहेर येताच त्यांना जखमींचे नातेवाईक व प्रसारमाध्यमांनी प्रश्न विचारायला सुरुवात केली. त्यावर, ‘आम्हाला काहीही विचारू नका, आमच्याकडे उत्तर नाही’, हे सांगताना त्यांच्या स्वरातला त्रागा लपत नव्हता. ‘या सर्वांना उत्तरे देण्यासाठी कुणाला तरी जबाबदार व्यक्तीला इथे पाठवा. आम्हाला जाऊ द्या’, असे तिथे त्यांची विचारपूस करण्यासाठी आलेल्या बेस्ट कर्मचाऱ्यांना सांगून त्यांनी काढता पाय घेतला.