दीपेश मोरे, मुंबई : गेल्या काही दिवसांत मुंबईत सोन्याच्या फसवणुकीच्या घटनांमध्ये कमालीची वाढ नोंदवण्यात आली आहे. पायधुनी येथील व्यापाऱ्याकडून दागिने घेऊन तमिळनाडू येथील कंपनीने तब्बल १५ कोटी रुपये दिलेच नसल्याचा प्रकार समोर आला आहे.
याबाबत पोलिसांनी दिलेल्या माहितीनुसार, वांद्रे येथे दागिन्यांच्या प्रदर्शनात जव्हेरी बाजारातील व्यापारी संयम मेहता यांची बिंदू सेल्वाकुमार आणि विजय कुमार यांच्याशी ओळख झाली होती. या दोघांनी त्यांची तमिळनाडू येथे ‘अभिस जेमग्लो’ ही कंपनी असल्याचे सांगितले. त्यांना दागिन्यांची गरज असल्याचे सांगत मेहता यांच्याकडे वेगवेगळ्या प्रकारच्या दागिन्यांची ऑर्डर दिली. मागणीप्रमाणे दागिने दिल्यानंतर त्यांनी मेहता यांना दागिन्यांचे अडीच कोटी रुपये दिले. त्यामुळे मेहता यांचा त्यांच्यावर विश्वास बसला. दोघांनी आणि त्यांच्या सहकाऱ्यांच्य मागणीनुसार आणखी सुमारे १० किलो सोन्याचे दागिने देण्यात आले. मात्र, या दागिन्यांच्या बिलापोटी येणारी १५ कोटी रुपयांपेक्षा जास्त रक्कम न दिल्याने मेहता यांनी त्यांच्याविरुद्ध पायधुनी पोलिस ठाण्यात तक्रार केली.
अंधेरी एमआयडीसी येथील एक कंपनी दागिन्यांवर हिरे बसविण्याचे काम करते. या कंपनीच्या वतीने दागिने बनविण्यासाठी तमिळनाडू येथील ‘रवी डायमंड’ या कंपनीकडे सोने दिले जाते. दागिने घडविल्यानंतर उरलेले शुद्ध सोने ‘रवी डायमंड’ यांच्या वतीने कंपनीला परत केले जाते. हे सर्व सुरळीत असताना सुमारे ३५० ग्रॅमपेक्षा अधिक वजनाचे सुमारे १५ लाख रुपयांचे शुद्ध सोने ‘रवी डायमंड’ यांनी देण्याचे बाकी ठेवले होते. मागणी करूनही ते मिळत नसल्याने गुन्हा दाखल करण्यात आला.
गुंतवणुकीचा निर्णय अंगलट
चुनाभट्टीच्या आयटी इंजिनीअरने सोन्यात गुंतवणुकीचा निर्णय घेतला. त्याची ओळख रोहित सेठ व नभ अंगलवार यांच्याशी झाली. रोहितने आपले जव्हेरी बाजारात दुकान असून, बाजारभावापेक्षा कमी किंमतीत सोने देण्याची बतावणी केली. त्यावर २३ ग्रॅमचे एक सोन्याचे बिस्किट हवे आहे, असे सांगत २ लाख ८५ हजार घेऊन हा तरुण रोहित व नभ यांना भेटला. मात्र, सोने आणून देतो असे सांगत दोघे पैसे घेऊन पसार झाले.
देवाचे दागिने हडप
वडाळा येथील एका सोनाराने तेथे विराजमान होणाऱ्या एका सार्वजनिक गणपतीसाठी सुमारे ३० लाख रुपयांचे दागिने बनवले होते. हे दागिने उत्सव कालावधी संपल्यानंतर पुन्हा सोनाराला दिले जात. मात्र, वडाळा येथून शिवाजी पार्क येथे राहण्यास गेल्याने ते दागिने लॉकरमध्ये ठेवतो, असे गणेशोत्सव मंडळाच्या पदाधिकाऱ्यांनी सांगितले. त्यानंतर देवाच्या अंगावर हे दागिने घातले जात नसल्याचे सोनाराला कळले. याबाबत विचारणा केली असता पदाधिकाऱ्यांनी आधी चोरीला गेल्याचे सांगितले आणि पोलिसांत तक्रार करताच चोराने दागिने आणून दिल्याचे सांगितले. सोनाराने हे दागिने मागितले असता पदाधिकारी केवळ उडवाउडवीची उत्तरे देत असल्याने त्यांच्या विरोधात रफी अहमद किडवाई मार्ग पोलिस ठाण्यात गुन्हा दाखल करण्यात आला आहे.
साडेपाच कोटींच्या सोन्यावर डल्ला
चारकोप परिसरात असलेल्या एका दागिने बनविण्याच्या कारखान्यातून सुमारे साडेपाच कोटी रुपयांच्या दागिन्यांची चोरी झाली आहे.
कारखान्यात काम करणाऱ्या तीन सुरक्षारक्षकांनी या कोट्यवधी रुपयांच्या सोन्यावर डल्ला मारल्याचा संशय आहे. दागिने गायब झाल्यापासून हे तिन्ही सुरक्षारक्षक कामावर येत नसल्याने मालकाने त्यांच्याविरुद्ध चारकोप पोलिस ठाण्यात तक्रार केली आहे.