बदलापूरहून येणारी जलद लोकल दुपारी ३.१८ वाजता नियोजनानुसार प्लॅटफॉर्म क्रमांक ४वर येणे अपेक्षित होते. परंतु सिग्नल यंत्रणेत झालेल्या गंभीर चुकीमुळे तिला प्लॅटफॉर्म क्रमांक ५चा सिग्नल देण्यात आला. त्याचवेळी त्या प्लॅटफॉर्मवर खोपोली लोकल उभी असल्याने काही क्षणांसाठी धडकी भरवणारी स्थिती निर्माण झाली. सीएसएमटीसारख्या अत्यंत व्यग्र स्थानकावर होम सिग्नल, इनर होम सिग्नल आणि प्लॅटफॉर्म सिग्नल अशा टप्प्यांत गाड्यांना प्रवेश दिला जातो; मात्र याच प्रक्रियेत झालेल्या त्रुटीमुळे गोंधळ उडाला.
Weather Updates: पुढील काही दिवस हवामानात मोठा बदल! कुठे उष्णतेची लाट, तर कुठे गारपीट; IMDकडून 13 राज्यांना अलर्ट जारी
बदलापूर लोकलने प्लॅटफॉर्म ५चा होम सिग्नल ओलांडला, परंतु पुढील इनर होम सिग्नल लाल असल्याचे लक्षात येताच मोटरमनने क्षणाचाही विलंब न करता ब्रेक लावला. त्यावेळी समोर उभ्या असलेल्या खोपोली लोकलपासून ती अवघ्या १३० मीटरवर होती. काही सेकंद उशीर झाला असता, तर गंभीर दुर्घटना घडली असती. या घटनेनंतर रेल्वे अधिकाऱ्यांनी तातडीने हालचाली करत या ट्रेनला मागे घेऊन योग्य प्लॅटफॉर्मवर आणले.

या गोंधळाचा परिणाम संपूर्ण स्थानकावर दिसून आला. प्लॅटफॉर्म क्रमांक ५, ६, ७ आणि ८ वर सुमारे २५ मिनिटे लोकलची ये-जा पूर्णपणे ठप्प झाली. परिणामी, सीएसएमटीकडे येणाऱ्या लोकल सिग्नलवर अडकल्या, तर प्लॅटफॉर्मवर प्रवाशांची प्रचंड गर्दी झाली. सायंकाळच्या गर्दीच्या वेळी हा परिणाम अधिक जाणवला; अनेक गाड्या पाच ते दहा मिनिटे उशिराने धावत होत्या. कामावरून घरी परतणाऱ्या प्रवाशांचे वेळापत्रक कोलमडले.
Devendra Fadnavis: विरोधकांचा खरा चेहरा उघडा पडला! महिला आरक्षण मुद्द्यावरुन मुख्यमंत्री फडणवीसांची टीका
सिग्नल देताना नेमकी चूक कुठे झाली, यासाठी मानवी हस्तक्षेप कितपत कारणीभूत होता आणि सुरक्षा प्रक्रियेत कोणत्या पातळीवर त्रुटी राहिल्या, याचा सखोल तपास करण्याचे आदेश देण्यात रेल्वेने दिले आहेत. प्राथमिक माहितीनुसार, या गोंधळामागे मानवी चूक ही प्रमुख कारण असण्याची शक्यता व्यक्त होत आहे.