यापूर्वी दुसऱ्या गुन्ह्याअंतर्गत त्याला न्यायालयीन कोठडी सुनावण्यात आली होती. त्यानंतर त्याचा ताबा एसआयटीने घेतला होता. सरकारवाडा पोलिस स्टेशनला दाखल असलेला गुन्हा नंबर तीन हा अत्यंत गंभीर आहे. यामध्ये खरातने ७ महिन्यांच्या गरोदर महिलेवर अत्याचार केल्याचा आरोप त्याच्यावर करण्यात आला आहे. प्रसूती सुरळीत व्हावी आणि मुलगाच होईल, असे सांगत त्याने संबंधित महिलेवर अत्याचार केल्याचे या गुन्ह्याच्या एफआयआरमध्ये नमूद आहे. दरम्यान, या प्रकरणाची सुनावणी आज पार पडली. ही सुनावणी व्हिडिओ कॉन्सफरींगद्वारे पार पडली. आरोपी खरातला व्हीसीद्वारे हजर करण्यात आले. न्यायालयीन प्रक्रियेदरम्यान, भोंदूबाबाच्या गुन्हेगारी कृत्याचे वाचन करण्यात आले.

सरकारी वकिलांचा युक्तिवाद

सरकारी वकील शैलेंद्र बागडे यांनी पीडित महिलांवर झालेल्या अत्याचाराचे स्वरूप आणि अघोरी कृत्यांची माहिती न्यायालयासमोर मांडली. आरोपी खरातने एका पीडित महिलेला ती सात महिन्यांची गरोदर असताना ‘धार्मिक पूजा’ करण्याच्या बहाण्याने कार्यालयात बोलावले आणि तिच्यावर अत्याचार केला. आरोपीच्या कार्यालयात प्लास्टिकचे साप, कवड्या, नकली वाघ आणि इतर अघोरी वस्तू सापडल्या आहेत.

Kalyan Crime : निवृत्त DCPची दादागिरी; महिलांशी गैरवर्तन, सोसायटी पदाधिकाऱ्यांना मारहाण, कल्याणमधील प्रकार सीसीटीव्हीत कैद

या वस्तू तो कोठून आणायचा आणि त्याचा वापर करून लोकांना कसा घाबरवायचा, याचा तपास करणे आवश्यक आहे. आरोपी महिलांना गुंगी येणारे द्रव्य द्यायचा, तसेच महेश कलंत्री नावाच्या व्यक्तीकडून तो विशेष खडे विकत घ्यायचा. या साखळीचा शोध घेण्यासाठी ७ दिवसांच्या कोठडीची मागणी सरकारी वकिलांनी केली. तसेच आरोपीकडून एक पेन ड्राईव्ह जप्त करण्यात आला असून, त्यात अनेक गंभीर पुरावे असण्याची शक्यता वर्तवण्यात आली आहे.

आरोपीच्या वकिलांचा कोठडीला विरोध

अशोक खरातचे वकील सचिन भाटे यांनी पोलीस कोठडीला विरोध करताना जुनीच कारणे सांगितली. पहिल्या आणि दुसऱ्या गुन्ह्यात पोलिसांनी कोठडी मागताना जी कारणे दिली होती, तीच कारणे आता तिसऱ्या गुन्ह्यातही दिली जात आहेत. यात नवीन काहीही नाही. गुन्ह्याचा कालावधी नोव्हेंबर ते डिसेंबर २०२५ सांगण्यात आला आहे. मग मधल्या काळात तक्रार का करण्यात आली नाही? पहिल्या दोन गुन्ह्यात जी चौकशी झाली आहे, तीच पुन्हा करण्यासाठी फक्त तपास अधिकारी बदलले म्हणून पोलीस कोठडी देण्याची गरज नाही, असा युक्तिवाद त्यांनी केला.

न्यायालयाचा निर्णय

दोन्ही बाजूंचा युक्तिवाद ऐकून घेतल्यानंतर न्यायालयाने अशोक खरातला विचारले की, “तुम्हाला काही बोलायचे आहे का?” त्यावर खरातने ‘नाही’ असे उत्तर दिले. पीडित महिला वेगळी असल्याने आणि गुन्ह्याचे स्वरूप गंभीर असल्याने, या प्रकरणाच्या सखोल तपासासाठी न्यायालयाने अशोक खरातला १३ तारखेपर्यंत ५ दिवसांची पोलीस कोठडी सुनावली आहे. या प्रकरणाने नाशिकसह संपूर्ण महाराष्ट्रात खळबळ उडाली असून, अजून किती लोकांची या भोंदूबाबाने फसवणूक केली आहे, याचा शोध आता पोलीस घेत आहेत.