17 ते 27 मार्च अनोखा उपक्रम

वरून नेहमीच्या कलिंगडासारखे दिसणारे हे फळ कापल्यानंतर आतून गडद पिवळ्या रंगाचे निघते, जे पाहून अनेक जण आश्चर्यचकित होतात. चवीला अधिक गोड, मऊ आणि रसाळ असलेल्या या ‘आरोही’ वाणाने ग्राहकांचे मन जिंकले आहे. विशेष म्हणजे, बाजारात सहज उपलब्ध नसलेल्या या कलिंगडामुळे ग्राहकांना एक वेगळाच अनुभव मिळत आहे. १७ ते २७ मार्च या कालावधीत पर्यटकांना शेतात येऊन स्वतःच्या पसंतीचे कलिंगड निवडण्याची संधी उपलब्ध करून देण्यात आली आहे. प्रति किलो ४५ रुपये दराने हे कलिंगड विकले जात असून, कुटुंबासह निसर्गाच्या सान्निध्यात वेळ घालवण्याची संधीही यातून मिळत आहे. त्यामुळे स्थानिकांसह बाहेरून येणाऱ्या पर्यटकांची गर्दी वाढत आहे.

आरोग्यासाठी उपयुक्त फळ

या उपक्रमामागे शेतकऱ्यांची कल्पकता आणि ग्राहकांना थेट शेताशी जोडण्याचा उद्देश आहे. पारंपरिक पद्धतीने घाऊक विक्री करण्याऐवजी थेट ग्राहकांपर्यंत पोहोचल्यामुळे शेतकऱ्यांना योग्य दर मिळत आहे. त्याचबरोबर कृषी पर्यटनाला नवी दिशा मिळत आहे. पिवळ्या कलिंगडात बीटा-कॅरोटीनसारखे पोषक घटक भरपूर प्रमाणात असल्याने ते आरोग्यासाठीही लाभदायक ठरते. त्यामुळे चव आणि आरोग्य या दोन्ही बाबतीत हे फळ ग्राहकांसाठी आकर्षणाचे केंद्र बनले आहे.

घोसाळे परिसरातील हा प्रयोग रायगड जिल्ह्यातील इतर शेतकऱ्यांसाठी प्रेरणादायी ठरत असून, भविष्यात अशा प्रकारच्या उपक्रमांमुळे शेतीला नवसंजीवनी मिळण्याची शक्यता आहे. एकूणच, ‘आरोही’ पिवळ्या कलिंगडामुळे रायगडमध्ये कृषी पर्यटनाचा नवा अध्याय लिहिला जात आहे.