यश हा राज्य शिक्षण मंडळाचा इयत्ता बारावीचा विद्यार्थी होता. त्याचे वडील आणि मोठा भाऊ अकाउंटिंगचे काम करतात. मिळालेल्या माहितीनुसार, बारावीची परीक्षा ११ मार्च रोजीच संपली होती. मात्र, यश दररोज ‘पेपर आहे’, असे सांगून घराबाहेर पडत होता. शनिवारी दुपारी २ वाजताच्या सुमारास ‘खेळायला जातो’, असे सांगून तो घरातून बाहेर पडला, तो परतलाच नाही. रात्री उशिरापर्यंत शोध घेऊनही यश न सापडल्याने पालकांनी हुडकेश्वर पोलिस ठाण्यात तो बेपत्ता असल्याची तक्रार नोंदवली होती. रविवारी सकाळी नऊ वाजताच्या सुमारास एम्प्रेस सिटी मॉलच्या दुसऱ्या माळ्यावर एका तरुणाचा मृतदेह रक्ताच्या थारोळ्यात पडला असल्याची माहिती मिळाली.

Nagpur Crime: पाचवीच्या विद्यार्थिनीचे गणित चुकले, शिक्षकाकडून अमानुष मारहाण; जिल्हा परिषद शाळेतील प्रकार
यशने इमारतीच्या चौथ्या माळ्यावरून उडी मारून आत्महत्या केल्याचा प्राथमिक अंदाज आहे. घटनेची माहिती मिळताच साहाय्यक पोलिस निरीक्षक पांडुरंग जाधव यांच्या नेतृत्वातील पथक आणि फॉरेन्सिक टीम घटनास्थळी दाखल झाली. घटनास्थळी पोलिसांना पाण्याचे पाकिट आणि उंदीर मारण्याचे औषधही सापडले आहे. यामुळे त्याने अत्यंत टोकाचे पाऊल उचलण्यापूर्वी पूर्ण तयारी केली असावी, अशी शक्यता वर्तवण्यात येत आहे.
Nagpur News : पाणी मागितल्याचा गैरसमज; ‘मुलं चोरणारी’ समजून वृद्ध महिलेला मारहाण, पोलिसांनी वाचवला जीव
तणावातून टोकाचे पाऊल ?
गणेशपेठ पोलिसांनी मृतदेह उत्तरीय तपासणीसाठी मेयो रुग्णालयात पाठवला असून आकस्मिक मृत्यूची नोंद केली आहे. प्राथमिक तपासावरून यशने मानसिक तणावातून हे पाऊल उचलल्याचे दिसत आहे, अशी माहिती पोलिसांनी दिली. परीक्षा संपल्यानंतरही तो घरच्यांना पेपर असल्याचे का सांगत होता, याचा तपास आता पोलिस करत आहेत.

महाविद्यालयीन तरुणीची आत्महत्या
नागपूर : कपिलनगर पोलिस ठाण्यांतर्गत येणाऱ्या संयोगनगर परिसरात १९ वर्षीय महाविद्यालयीन तरुणीने शनिवारी गळफास घेत आत्महत्या केली. पूर्वा साखरे (रा. संयोगनगर, नारी रोड) असे मृत तरुणीचे नाव आहे. पूर्वा ही शहरातील एका नामांकित महाविद्यालयात बीएससी द्वितीय वर्षात शिक्षण घेत होती. शिक्षणासोबतच ती रामदासपेठ येथील एका सोशल मीडिया कार्यालयात व्यवस्थापक (मॅनेजर) म्हणून कार्यरत होती. मिळालेल्या माहितीनुसार, शनिवारी पूर्वाने आपल्या राहत्या घरी छतावरील लाकडी दांड्याला ओढणीच्या साहाय्याने गळफास लावून आत्महत्या केली. घटनेची माहिती मिळताच कपिलनगर पोलिसांनी घटनास्थळ गाठून पंचनामा केला. पोलिसांना घटनास्थळी कोणतीही सुसाइड नोट सापडलेली नाही. त्यामुळे पूर्वाने हे टोकाचे पाऊल का उचलले, याचे कारण अद्याप स्पष्ट होऊ शकलेले नाही. पोलिसांनी सध्या याप्रकरणी आकस्मिक मृत्यूची नोंद केली आहे.

लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाईनमध्ये ३ वर्षांपासून कन्सल्टंट म्हणून कार्यरत आहे.या आधी सकाळ मिडियामध्ये २ वर्ष कामाचा अनुभव आहे. चालू घडामोडी, गुन्हेगारी, राजकीय विषयांच्या बातम्यांत विशेष आवड.… आणखी वाचा