अजित पवार यांच्या विमान अपघाताच्या घटनेत दोषी असणाऱ्यांना तुरुंगात पाठवल्याशिवाय किंवा शिक्षा केल्याशिवाय आपण शांत बसणार नसल्याचं रोहित पवार म्हणाले. यावेळी त्यांनी सुनेत्रा पवार यांनादेखील भर सभागृहात शब्द दिला. “मला काकींना सांगायचं आहे. काकी तुमच्या पुढच्या राजकीय प्रवासामध्ये या छोट्या कार्यकर्त्यांचं, तुमच्या पुतण्याला जिथे कुठे मदत लागेल तिथे मी तयार असेन. जेवढं बोलेन तेवढं कमी आहे. काकांच्या विचारांवर आणि काकांच्या स्टाईलने नक्कीच काम करत राहीन. धन्यवाद. रामकृष्ण हरी”, असं रोहित पवार म्हणाले.

“अध्यक्ष महोदय, माझे अजित काका, महाराष्ट्राचे अजित दादा, विकासाचे अजित दादा, आजचा हा प्रसंग माझ्यासाठी आणि सर्वांनाच प्रचंड भावनिक आहे. शरद पवार यांच्या बरोबर ज्यांच्याकडे बघून आम्ही राजकारणात प्रेरणा घेतली तो आमचा अभिमान, स्वाभिमान, आमचे आधार, माझे काका आणि महाराष्ट्राचे अजित दादा, ज्यांच्या शोक प्रस्तावावर बोलण्यास आज मी या ठिकाणी उभा आहे”, असं रोहित पवार सुरुवातीला म्हणाले.

“मुख्यमंत्री देवेंद्र फडणवीस यांनी आज हा शोक प्रस्ताव मांडला. या प्रस्तावाला मी पाठिंबा देतो. 66 वर्षे 6 महिने आणि 6 दिवस असा अजित दादांचा प्रवास, पायाखालची जमीन सरकणे काय असते ते 28 जानेवारीला आम्ही सर्वांनी अनुभवलं. अजित दादांचं कार्य, हे 40 वर्षांपेक्षा जास्त आहे. माझं वय 40 आहे, माझ्या वयापेक्षा जास्त अनुभव अजित काकांचा राजकारणात होता. या सगळ्या गोष्टींबद्दल बोलणं काही मिनिटांत बोलणं तसं सोपं नाही. कितीही पानं वाचली तरी त्यांचा राजकीय प्रवास, सामाजिक प्रवास, त्यांनी केलेली कामे जेवढं बोलेल तेवढं कमी आहे”, असं रोहित पवार म्हणाले.

रोहित पवार काय-काय म्हणाले?

“1982 मध्ये ते छत्रपती सहकारी साखर कारखान्याचे संचालक म्हणून ते निवडून आले. त्यावेळेस सुरु झालेला प्रवास हा 2026 पर्यंत राज्याचे उपमुख्यमंत्री म्हणून काही काळ अजून मिळाला असता, काही वर्षे त्यांना मिळाले असते तर राज्याचं प्रमुख राजकीय स्थान म्हणजे मुख्यमंत्री सुद्धा अजित दादा झाले असते हा आम्हाला विश्वास आहे.”

“या विधानसभेत आल्यानंतर अजूनसुद्धा अजित दादा कुठे बसले आहेत, आमच्याकडे लक्ष ठेवून असतील, अधिवेशनात येत असताना अजूनही आपल्याल आठवत असेल, त्यांची कपडे घालण्याची स्टाईल, कधीतरी गॉगल घालणार, त्यांच्याबरोबर आमदारांचा घोळका, कार्यकर्त्यांचा घोळका, मीडिया बरोबर मी बोलत असेल तर मागून मिश्किलपणे एखादा टोमणा मारणं असेल, त्याचबरोबर अधिवेशनात बसल्याबरोबर कोण काय बोलतंय, शांतपणे या अधिवेशनात काय चाललंय हे बारकाईने अजित काका बघत असत.”

“त्याचबरोबर भाषण करत असताना मध्येच कुणी अडवलं, थांबलं, नाहीतर खूप आवाज केला तर मिश्किलपणे असेही बोलून जायचे, जास्त आवाज केला तर तू मंत्री होणार नाही याचीदेखील काळजी मी घेईन. त्याचबरोबर शरद पवारांबद्दल चुकून कुणी बोललं तर त्यांनी या सभागृहावर डोक्यावर घेताना सुद्धा बघितलं आहे. या सभागृहात येणारा पहिला नेता कोण असेल तर अजित दादा असायचे, सभागृहाचे कामकाज संपल्यानंतर सर्वात शेवटी जाणारे नेता देखील अजित दादा असायचे.”