Sharad Pawar : महाराष्ट्रातील काँग्रेसच्या नेत्यांकडून शरद पवारांच्या नावाला विरोधाचा झेंडा दाखविण्यात आला असल्याची माहिती सूत्रांनी दिली.
राज्यसभेच्या द्विवार्षिक निवडणुकीसाठी १६ मार्च रोजी मतदान होईल. राज्यसभा निवडणूक जाहीर झाल्याने राजकीय पक्षांमध्ये मतांची जुळवाजुळव सुरू झाली आहे. विधानसभा निवडणुकीनंतर जवळपास निकालात निघालेल्या महाविकास आघाडीच्या ऐक्याची या निवडणुकीत कसोटी लागणार आहे. त्यात महाविकास आघाडीच्या वाट्याला राज्यसभेची एकच जागा येत असल्याने ती राष्ट्रवादी (शप) पक्षाचे ज्येष्ठ नेते शरद पवार यांना दिली जाणार की, अन्य कोणाला याची जोरदार चर्चा रंगली आहे. महाविकास आघाडीची एकजूट महत्त्वाची ठरणार आहे.
राष्ट्रवादी काँग्रेस शरदचंद्र पवार पक्षाचे अध्यक्ष शरद पवार, फौजिया खान, भाजपचे डॉ. भागवत कराड, धैर्यशील पाटील, रिपब्लिकन पक्षाचे नेते तथा केंद्रीय राज्यमंत्री रामदास आठवले, काँग्रेसच्या रजनी पाटील आणि शिवसेना (उबाठा) पक्षाच्या प्रियांका चतुर्वेदी यांची राज्यसभेची मुदत दोन एप्रिल २०२६ रोजी संपत आहे.
उपमुख्यमंत्री अजित पवार आणि राहुरीचे शिवाजीराव कर्डिले यांच्या निधनामुळे विधानसभेतील दोन जागा रिक्त आहेत. विधानसभेत भाजपचे १३१, शिवसेनेचे ५७, राष्ट्रवादी काँग्रेसचे ४०, शिवसेना (उबाठा) पक्षाचे २०, काँग्रेसचे १६, राष्ट्रवादी-शपचे १० तसेच अपक्ष आणि इतर मिळून १२ असे संख्याबळ आहे. राज्यसभेवर निवडून जाण्यासाठी पहिल्या पसंतीच्या ३७ मतांची गरज आहे. त्यामुळे भाजपचे चार, शिवसेना आणि राष्ट्रवादीचा प्रत्येकी एक तसेच महाविकास आघाडीचा एक उमेदवार निवडून जाऊ शकतो.
काँग्रेसचा विरोध
महाराष्ट्र काँग्रेसच्या बुधवारी मुंबईत पार पडलेल्या कामकाज सल्लागार समितीच्या बैठकीत या निवडणुकीबाबत प्राथमिक चर्चा झाल्याची माहिती समोर आली आहे. महाविकास आघाडीकडून शरद पवार यांच्या नावाला पसंती दिल्यास काँग्रेसकडून त्याला विरोध होऊ शकतो, अशी माहिती पक्षातील काही ज्येष्ठ नेत्याने ‘महाराष्ट्र टाइम्स’ला दिली. गेल्या काही दिवसांपासून राज्यातील राजकीय परिस्थिती लक्षात घेता राष्ट्रवादी काँग्रेसची भाजपसोबत वाढलेली जवळीक आणि त्याबाबतच्या चर्चा लक्षात घेता शरद पवारांना संधी देऊ नये, अशी मागणी काँग्रेसच्या एका गटातून केली जात आहे.
महाविकास आघाडीकडून नव्या चेहऱ्याला संधी द्यावी, असे मत अनेकांनी व्यक्त केले. राष्ट्रवादी काँग्रेस शप भाजपसोबत जाऊ शकते, अशी दाट शक्यता गेल्या काही दिवसांपासून वर्तवली जात आहे. यासोबतच राष्ट्रवादीच्या विलीनीकरणाची जोरदार चर्चा गेल्या काही दिवसांपासून सुरू आहे. त्यामुळे शरद पवारांना ही जागा सोडल्यास महाविकास आघाडीच्या वाट्याला येणारी एक जागाही नंतर महायुतीकडे जाऊ शकते, असे मत व्यक्त केले जात आहे.
SEBC Reservation : मुस्लीम समाजाचे एसईबीसी आरक्षण रद्द, राज्य सरकारकडून धक्का, 12 वर्ष जुना निर्णय बदलला
अंतिम निर्णय दिल्लीत
काँग्रेसमधील एक गट शरद पवारांच्या नावाला विरोध दर्शवत असला तरी याबाबत अंतिम निर्णय पक्षश्रेष्ठींकडूनच घेतला जाणार असल्याचे सांगण्यात येते. त्यामुळे याबाबत तूर्तास तरी अधिकृतरित्या कोणीही यास दुजोरा दिलेला नाही. या निवडणुकीत काँग्रेसकडून नव्या चेहऱ्याला संधी द्यावी, यासाठी लवकरच पक्षश्रेष्ठींची भेट घेणार असल्याची माहितीही सूत्रांनी दिली.Ajit Pawar Death : दादांच्या विमानातील कागदपत्रं जळाली नाहीत, रेकॉर्डरचं कसं नुकसान? तर्कवितर्कांवर मंत्रालयातून अखेर उत्तर
शरद पवारांचा नकार, की…?
शिवसेना (उबाठा) पक्षाचे नेते संजय राऊत यांनी काही दिवसांपूर्वीच शरद पवार यांच्या नावाचा संकेत दिला होता. पण, राष्ट्रवादी (शप)मधून अद्याप याविषयी अधिकृत माहिती समोर आलेली नाही. शरद पवार सध्या ८५ वर्षांचे आहेत. त्यांनी यापूर्वीच राज्यसभेची निवडणूक लढवणार नसल्याचे म्हटले होते. वाढलेले वय आणि प्रकृती लक्षात घेता पवार राज्यसभेवर जातील का, हा प्रश्न आहे. पवारांनी राज्यसभेवर जाण्यास नकार दिला, तर आघाडीला सहमतीचा उमेदवार द्यावा लागेल.
अजित पवारांच्या अपघातावर रोहित पवारांना संशय; ब्लॅक बॉक्सबाबत सुप्रिया सुळेंना मोठा विश्वास
लेखकाबद्दलअनिश बेंद्रेअनिश सतीश बेंद्रे, महाराष्ट्र टाइम्स ऑनलाईनमध्ये सहाय्यक वृत्त संपादक पदावर कार्यरत आहेत. गेल्या तीन वर्षांपासून ते मटासोबत काम करत आहेत. राजकीय, गुन्हेगारी आणि मनोरंजन या विषयातील बातम्यांमध्ये त्यांचा विशेष हातखंडा आहे. ब्रेकिंग न्यूजसोबतच निवडणूक विषयक विश्लेषण करण्यात त्यांना अधिक रस आहे. त्यांनी झेविअर्स कॉलेजमधून मास कम्युनिकेशनचे पदव्युत्तर शिक्षण घेतले आहे. आतापर्यंत एबीपी माझा, टीव्ही9 मराठीसह पत्रकारिता क्षेत्रात 12 वर्षांहून अधिक काळचा अनुभव त्यांना आहे… आणखी वाचा