पुणे: भिगवणमधील तरुणीच्या अपहरणाचं प्रकरण गाजत असताना त्यात एक मोठा ट्विस्ट आला आहे. काल संध्याकाळी चारच्या सुमारास तरुणीचं दोन तरुणांनी अपहरण केलं. तरुणी तिच्या लग्नाची खरेदी करुन आई, भावासोबत घरी परतत होती. त्यावेळी दोन तरुणांनी मुलीच्या आणि भावाच्या डोळ्यांमध्ये मिरचीपूड टाकली. यानंतर त्यांनी तरुणीचं अपहरण केलं. या प्रकरणी हिंदुत्त्ववादी संघटनांनी आक्रमक भूमिका घेत भिगवण बंदची हाक दिली. अपहरण झालेली तरुणी, आरोपी तरुण पोलिसांना अद्याप सापडलेला नाही. पण त्या तरुणीचा एक व्हिडीओ समोर आला आहे. त्यामुळे या प्रकरणाला नाट्यमय वळण मिळालं आहे.

संबंधित तरुणीचा एक व्हिडिओ समोर आला असून त्यामध्ये तिने स्वतःच्या इच्छेने तरुणासोबत गेल्याचे स्पष्ट केले आहे. “माझे आणि त्याचे अनेक वर्षांपासून प्रेमसंबंध आहेत. त्याने मला कोणत्याही प्रकारची जबरदस्ती केलेली नाही. मी माझ्या मर्जीने त्याच्यासोबत निघून आले आहे,” असं स्पष्टीकरण संबंधित तरुणीनं दिलं आहे. त्यामुळे हे सगळं प्रकरण अपहरणाचं आहे की प्रेम प्रकरणाचं असा प्रश्न निर्माण झाला आहे.

दरम्यान, घटनेनंतर पोलिसांनी अपहरणाचा गुन्हा दाखल करून तपास सुरू केला होता. तरुणीचा व्हिडिओ समोर आल्यानंतर पोलिसांकडून तिचा जबाब नोंदवण्याची प्रक्रिया सुरू करण्यात येणार असल्याची माहिती सूत्रांनी दिली आहे. तिचे वय, नातेसंबंधांची पार्श्वभूमी आणि कुटुंबियांच्या तक्रारीच्या अनुषंगाने कायदेशीर बाबींची पडताळणी केली जाणार आहे.

गेल्या महिन्याभरात तरुणी आणि तरुणाचे २१ कॉल्स झाल्याची माहिती सीडीआरच्या माध्यमातून पोलिसांच्या हाती लागली आहे. ज्या तरुणावर अपहरणाचे आरोप झाले आहेत, त्याचं घर तरुणीच्या घरापासून अवघ्या १०० मीटरवर आहे. दोघेही अद्याप पोलिसांच्या हाती लागलेले नाहीत. अपहरणाला २४ तास उलटून गेले आहेत. पोलिसांच्या सहा पथकांकडून त्यांचा शोध सुरु आहे.

या प्रकरणी हिंदुत्त्ववादी संघटनांनी आक्रमक भूमिका घेतली आहे. तरुणीला लवकरात लवकर शोधण्याची आणि तरुणाला अटक करण्याची मागणी त्यांनी केली आहे. भाजपचे आमदार गोपीचंद पडळकर आणि राष्ट्रवादी काँग्रेसचे आमदार संग्राम जगताप यांनी भिगवण पोलीस ठाणं गाठून अधिकाऱ्यांशी चर्चा केली. तरुणीचा व्हिडीओ तिच्यावर दबाव टाकून तयार करण्यात आला असल्याचा दावा त्यांनी केला. आरोपीला लवकरात लवकर अटक करण्याची मागणी त्यांनी केली. त्यानंतर त्यांनी पोलीस ठाण्याबाहेर जमलेल्या गर्दीशी संवाद साधला. पोलिसांसोबत झालेल्या चर्चेची माहिती त्यांना दिली.