छत्रपती संभाजीनगरच्या पोलिसांनी तातडीने ती पिस्तूल जप्त केली आणि घातपाताच्या संशयातून तपासाला सुरुवात केली. पोलिसांनी कार्यालयातील सीसीटीव्ही फुटेज तपासून तातडीने कामाला सुरुवात केली. या तपासातून पोलिसांनी पिस्तूल ठेवणाऱ्या तरुणाला शोधून काढलं आहे. सीसीटीव्हीच्या आधारावर तरुणाची ओळख पटवण्यात आली. रितेश संतोष होळकर असं एअरगन ठेवणाऱ्या तरुणाचं नाव आहे.

छत्रपती संभाजीनगरच्या क्रांती चौक पोलिसांनी संतोष होळकर याला ताब्यात घेतले आहे. आतापर्यंत या तरुणाची कुठली गुन्हेगारी पार्श्वभूमी नाही. पण त्याने ही गन कशासाठी घेतली होती? त्याची कसून चौकशी करण्यात येत आहे. रितेश संतोष होळकर याच्या विरोधात क्रांती चौक पोलीस ठाण्यात गुन्हा दाखल करण्यात आला असून पुढील तपास पोलीस करत आहेत.

पोलीस काय म्हणाले?

क्रांती चौक पोलीस ठाण्याचे वरिष्ठ पोलीस निरीक्षक सुनील माने यांनी या घटनेवर प्रतिक्रिया दिली आहे. “आज सकाळी भाजप आमदार संजय केनेकर यांच्या क्रांती चौकातील कार्यालयात एक काळी बॅग मिळाली. त्या बॅगमध्ये पिस्तूलसदृश्य अग्निशस्त्र असल्याची आम्हाला माहिती मिळाली. आम्ही तात्काळ त्या ठिकाणी गेलो आणि पाहणी केली. आम्ही पाहणी केली असता तिथे एअर गन मिळाली जी छर्रेवाली होती. आम्ही रितसर पंचनामा करुन ती गन जप्त केली आहे. शोध घेतला असता ती एअर गन रितेश होळकर नावाच्या तरुणाने विकत घेतलेली. या प्रकरणी रितसर गुन्हा दाखल करण्याची कारवाई आहे”, अशी प्रतिक्रिया वरिष्ठ पोलीस निरीक्षक सुनील माने यांनी दिली.

“रितेश होळकर त्याच्या वैयक्तिक कामांसाठी संजय केनेकर यांच्या कार्यालयात गेला होता. त्याने त्याची बॅग तिथे ठेवला आणि तिथून निघून गेला होता. या प्रकरणी आता तपास सुरु आहे. रितेश होळकर या तरुणाची गुन्हेगारी पार्श्वभूमी नाही. पण त्याने हे कृत्य का आणि कशासाठी केलं? याची आम्ही चौकशी करत आहोत”, अशी प्रतिक्रिया देखील त्यांनी दिली.