सातारा जिल्हा परिषदेत कोणत्याही पक्षाला स्पष्ट बहुमताचा आकडा गाठता आला नाही. त्यामुळे त्रिशंकू परिस्थिती निर्माण झाली आहे. अशा स्थितीत राष्ट्रवादी काँग्रेस आणि शिवसेना यांच्याकडे सत्ता स्थापन करण्याइतके संख्याबळ आहे. भाजप, राष्ट्रवादी काँग्रेस आणि शिवसेना या तीनही पक्षांनी स्वबळावर निवडणूक लढवली आहे. भाजपला सर्वाधिक २७ जागा मिळाल्या आहेत. पण, भाजप नेत्यांनी प्रचारात महायुतीतील घटक पक्षांच्या नेत्यांवर जहरी टीका केल्यामुळे भाजपला सत्तेपासून दूर ठेवले जात आहे.

जिल्हा परिषदेच्या सत्तानाट्याला वेग आला असतानाच आज जिल्हाधिकारी कार्यालयातील बैठकीनंतर सार्वजनिक बांधकाम मंत्री शिवेंद्रराजे भोसले आणि पालकमंत्री शंभूराज देसाई यांना पत्रकारांनी छेडले असता पालकमंत्री शंभूराजे भोसले यांच्यासमोर शिवेंद्रराजे म्हणाले की, “शंभूराज देसाई हे जिल्ह्याचे पालक आहेत. त्यांच्या पालकत्वाखाली आम्ही आहोत. आम्ही हात द्यायला नाही तर मिठी मारायला तयार आहोत. आता त्यांना चालतंय का बघू.”

नगरपालिका निवडणुकीवेळी शंभूराजेंनी आयोजित केलेल्या बैठकीला हजर न राहिल्याने नाराजी आहे का? या प्रश्नाला उत्तर देताना शिवेंद्रराजे म्हणाले, “शंभूराजेंनी थेट मला बोलावलं आणि मी आलो नाही, असे होत नाही. त्यांचा तो निरोप व्हाया व्हाया आला होता. त्यामुळे जरा घोटाळा झाला. भाजपच्या सदस्यांचा आकडा जरी मोठा असला तरी शंभूराज देसाई मोठे आहेत. त्यामुळे आता जिल्हा परिषदेत एकत्र येण्याबाबत पालकमंत्रीच सांगतील. आम्ही वाट बघत बसलो आहोत. मोठ्यांनी सामावून घेतलं पाहिजे.”

“बंदूक मागितल्यावर तोफ मिळत नाही. म्हणून आधी तोफ मागितली की बंदूक तरी मिळेल”, अशी खोचक प्रतिक्रिया देत पालकमंत्री शंभूराज देसाईंनी शिवेंद्रराजेंच्या मिश्किल टिपण्णीला प्रत्युत्तर दिले. जिल्हाधिकारी कार्यालयातील बैठकीत महायुतीच्या नेत्यांमध्ये खेळीमेळीचे वातावरण पाहायला मिळाले. परंतु, राष्ट्रवादी काँग्रेस आणि शिवसेना सत्तेत भाजपला सहभागी करून घेणार का? हे पाहणे रंजक ठरणार आहे.