बारामती तालुक्यातील सुपा परगण्यातील सुपा पंचायत समितीची जागा अजितदादांनी भाजपला दिली होती. तालुक्यात दोनच जागांसाठी राष्ट्रवादी काँग्रेसने युती केली होती. त्या प्रचारासंदर्भात चर्चा करण्यासाठी अजितदादांनी खैरे यांचे सहकारी दिलीप खैरे यांना बोलाविले होते. मात्र, खैरे यांना सकाळी अचानक दुसरे काम असल्याने त्यांच्याऐवजी पोपटराव खैरे भेटीसाठी गेले होते. विमानतळावर दादांच्या स्वागतासाठी खैरे आणि त्यांचे सहकारी प्रतीक्षेत थांबले होते. त्या वेळी विमान दुर्घटना घडली. ती प्रत्यक्ष घटना त्यांनी ‘मटा’शी बोलताना कथन केली.

‘बुधवारी सकाळी आठ वाजून ४० मिनिटांनी आम्ही दादांचे स्वागत करायला बारामती विमानतळावर गेलो होतो. विमान धावपट्टीवर न येता त्याच्या खाली उतरले. त्या वेळी धावपट्टी पायलटच्या लक्षात आली नसावी. त्या गावाला चार-पाच किलोमीटर अंतरापर्यंत पुन्हा घिरट्या घातल्या. खाली उतरताना धावपट्टीवर न येता खालील बाजूस विमान उतरल्याने स्फोट झाला. त्या ठिकाणी तेथे प्रशिक्षणासाठीची काही विमाने होती. त्यामुळे शंका येत होती. घटनास्थळी गेलो, तर ते दादांचेच विमान होते. त्या वेळी आगीचा डोंब उसळला होता. आगीच्या झळा इतक्या मोठ्या होत्या, की त्यापासून वाचणे कठीण होते. दादांच्या चेहऱ्याला आगीच्या झळा जास्त बसल्या. विमानाला आग लागल्यानंतर दादांचा मृतदेह बाहेर पडलेला होता,’ अशा शब्दांत पोपटराव खैरे यांनी घटना कथन केली.

‘अग्निशमन’कडे कमी पाणी

विमानतळावर घटनास्थळानंतर बारामती नगरपालिकेच्या अग्निशमन दलाच्या गाड्या घटनास्थळी आल्या. मात्र, त्यामध्ये पुरेसे पाणी नव्हते. शेजारी राहणाऱ्या रहिवाशांच्या घरांतून पाणी आणावे लागले. त्यानंतर तासाभरात अग्निशमन दलाच्या काही गाड्या पोहोचल्या आणि आग आटोक्यात आली, असेही प्रत्यक्षदर्शींनी सांगितले.