नाशिकचे पालकमंत्री असलेल्या गिरीश महाजन यांनी ध्वजारोहणानंतर भाषण केलं. या भाषणात महाजन यांनी घटनाकार डॉ. बाबासाहेब आंबेडकर यांचा उल्लेख टाळला, असा आक्षेप वनसंरक्षक असलेल्या माधुरी जाधव यांनी केला. त्यांनी याविषयी महाजन यांना जाबही विचारला. त्यामुळे काहीसा गोंधळ उडाला. कारवाई करायची असेल तर खुशाल करा. हवं तर निलंबित करा, असा पवित्रा माधुरी जाधव यांनी घेतला आहे.

यानंतर आता वनरक्षक माधुरी जाधव यांनी नाशिकच्या सरकारवाडा पोलीस ठाण्यात मंत्री गिरीश महाजन यांच्या विरोधात लेखी तक्रार दाखल केली आहे. जाधव यांच्या सोबत वनरक्षक दर्शना सौपुरेंकडून महाजनांच्या विरोधात पोलीस तक्रार देण्यात आलेली आहे. यावेळी जाधव यांच्या समर्थनार्थ पोलीस ठाण्याबाहेर मोठी गर्दी पाहायला मिळाली. त्यामुळे हे प्रकरण अधिक तापण्याची चिन्हं दिसू लागली आहेत.

माझ्याकडून बाबासाहेबांचा उल्लेख अनावधानानं राहून गेला, असं स्पष्टीकरण महाजन यांनी दिलं. त्यावरही माधुरी जाधव यांनी भाष्य केलं. ‘एखादी कमी शिकलेली व्यक्ती असेल तर अनावधानानं झालेली चूक मान्य करतो. पण सुशिक्षित आणि मोठ्या पदावरील व्यक्तीनं अशी चूक करणं अपेक्षित नाही. भारताला स्वातंत्र्य मिळून ७७ वर्षे झाली. पण आमच्या जातीच्या लोकांना अद्याप स्वातंत्र्य मिळालेलं नाही. कायदा आणि संविधान असल्यानं आम्हाला माणूस म्हणून स्वीकारलं जातंय. कायदा आड येतो म्हणून ते आम्हाला माणूस स्वीकारतात, हे त्यांच्या कृतीतून आज लक्षात आलं,’ असं माधुरी जाधव तक्रार दाखल केल्यानंतर म्हणाल्या.

आम्हाला कोणाचीही भीती वाटत नाही. पण आम्हाला इतिहासाची पुनरावृत्ती होऊ द्यायची नाही. आज प्रजासत्ताक दिन . बाबासाहेबांनी संविधान दिलं हे जगजाहीर आहे. पण आजच्या घटनाकार बाबासाहेब आंबेडकर यांचं नाव न घेता घटनेशी संबंध नसलेल्या बाकीच्या लोकांची नावं आवर्जून घेतली गेली. याला आक्षेप असल्याचं माधुरी जाधव यांनी म्हटलं.